ინფექციური პათოლოგიისა და შიდსის ცენტრის მედპერსონალმა ინფექციური საავადმყოფოს ტერიტორიაზე საპროტესტო აქცია გამართა.

ისინი შიდსის ცენტრის აღდგენასა და სახელმწიფოს მხრიდან ინფექციური საავადმყოფოსთვის ინფრასტრუქტურის მიმართულებით, ყურადღების მიქცევას ითხოვენ.

აქციის მონაწილეები ამბობენ, რომ უნდა შეიქმნას ახალი ინფექციური საავადმყოფო, სადაც ექნებათ საშუალება, პაციენტებს უმკურნალონ.

„ჩვენ ვართ ის დაწესებულება, რომელსაც ყველაზე მეტად უნდა ეფერებოდეს სახელმწიფო. ეს არის დაწესებულება, სადაც უმძიმესი კონტინგენტი მოდის. ჩვენ გადავარჩინეთ ქვეყანა შიდსისა და ჰეპატიტისგან. მათ ყველაფერი წაგვართვეს. ჩვენ არ გვაქვს ინფრასტრუქტურა. მოვითხოვთ, შეიქმნას ახალი ინფექციური საავადმყოფო, სადაც გვექნება საშუალება, ვემსახუროთ ჩვენს  ხალხს. მოვითხოვთ ყურადღებას სახელმწიფოსგან და პირობების გაუმჯობესებას“, - განუცხადა „ექსპრესნიუსს“ ექიმმა ინფექციონისტმა ფატი გაბუნიამ.

ადგილზე პრემიერ-მინისტრი გიორგი კვირიკაშვილი და ჯანდაცვის მინისტრი დავით სერგეენკო იმყოფებოდნენ, ვინაიდან აკადემიკოს ვახტანგ ბოჭორიშვილის სახელობის კლინიკის გახსნას ესწრებოდნენ. ისინი აქციის მონაწილეებს გაესაუბრნენ. პრემიერმა მედიკოსების პრობლემები მოისმინა და აღნიშნა, რომ დღესვე გამონახავს დროს მათთან შესახვედრად.

გიორგი კვირიკაშვილის განცხადებით, სახელმწიფო ყველაფერს გააკეთებს, რათა დაბალანსებული გადაწყვეტილება მოძებნოს. მისივე თქმით, მნიშვნელოვანია, არც ერთი პროფესიონალის ღვაწლი არ დაიკარგოს.

აქციის მონაწილეებს ადგილზე პლაკატები ჰქონდათ მიტანილი წარწერით - „დაგვიბრუნეთ შიდსის ცენტრი, ეს აუცილებელია ჩვენი სიცოცხლისთვის“, „რატომ დაგვიკარგეთ გლობალური ფონდის მიერ შიდსის ცენტრისთვის გამოყოფილი 4,5 მილიონი ევრო“, „ჩვენ გადავარჩინეთ ქვეყანა შიდსისა და ჰეპატიტისგან, თქვენ კი, ყველაფერი წაგვართვით“, „თუ არ გვიშველით, C ჰეპატიტის ელიმინაციის უნიკალური პროგრამა გაჩერდება“, „მივმართავთ ჯანდაცვის სამინისტროს, ნუ გაწირავს პაციენტებს“.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მთავრობამ კვების ობიექტებისთვის პლასტმასის ერთჯერადი კონტეინერებისა და ჭიქებით სურსათის მიწოდების აკრძალვის ამოქმედება გადაავადა

ანაკლიის პორტს სახელმწიფო ააშენებს - მთავრობამ პროექტის მოდელი შეცვალა

Politico: ნატოს ქვეყნები რუსეთთან ომის შემთხვევაში თავდაცვას აძლიერებენ

ირანი საზოგადოებრივი აზრის გასაკონტროლებლად ხამენეის დაკრძალვის გაშუქების ერთიან წესებს აწესებს