„დაუშვებლად მიმაჩნია საუბარიც კი, რომ უკრაინამ ტერორისტების სახელმწიფოს ჩვენი ძმა და თანამებრძოლი გადასცეს“

2017-01-25 18:06:40, 3253 ნახვა

სამართალი საზოგადოება მსოფლიო

მე ვთვლი და დაუშვებლად მიმაჩნია საუბარიც კი, რომ უკრაინამ ტერორისტების სახელმწიფოს გადასცეს ჩვენი ძმა და თანამებრძოლი, - ამის შესახებ "რუსთავი 2"-თან სატელეფონო ინტერვიუში უკრაინის შინაგან საქმეთა მინისტრის მრჩეველმა ზორიან შკირიაკმა განაცხადა.

მისი განცხადებით, რუსეთის სპეცსამსახურები მუდმივად ახორციელებენ დივერსიულ-ტერორისტულ მოქმედებებს უკრაინის ტერიტორიაზე. მისივე განცხადებით, ის ამაყობს ქართველი ძმებით და თვლის, რომ ისინი საქართველოს და უკრაინის პატრიოტები არიან.

„რუსეთი ჩვენი მტერია და მისი სპეცსამსახურები მუდმივად ახორციელებენ დივერსიულ-ტერორისტულ მოქმედებებს უკრაინის ტერიტორიაზე. როგორ მოხდა ცერცვაძის მონაცემები რუსეთის ხელში, ამის თქმა მიჭირს, თუმცა ეს ფაქტი გარკვეული დასკვნების საფუძველი ნამდვილად უნდა გახდეს. ის რაც გულწრფელად შემიძლია ვთქვა, არის ის, რომ ვამაყობ ჩვენი ქართველი ძმებით. ვთვლი, რომ ისინი საქართველოს და უკრაინის პატრიოტები არიან, დღეს ისინი უკრაინელ მებრძოლებთან ერთად, იარაღით ხელში წინააღმდეგობას უწევენ რუს აგრესორებს. ამიტომაც, რა თქმა უნდა, მე ვთვლი და დაუშვებლად მიმაჩნია საუბარიც კი, რომ უკრაინამ ტერორისტების სახელმწიფოს გადასცეს ჩვენი ძმა და თანამებრძოლი,“ - განაცხადა უკრაინის შინაგან საქმეთა მინისტრის მრჩეველმა ზორიან შკირიაკმა.

ცნობისთვის, ქართული ლეგიონის ხელმძღვანელის, მამუკა მამულაშვილის განცხადებით, ამ ეტაპზე მზადდება ოფიციალური დოკუმენტი, რომელიც უკრაინის პროკურორს გადაეგზავნება და დაადასტურებენ, რომ ცერცვაძე უკრაინის ომში უკრაინის მხარეზე ნამდვილად იბრძოდა. მისივე თქმით, გია ცერცვაძეს ხუთშაბათს, სასამართლოს შემდეგ გაათავისუფლებენ.