შს მინისტრის ყოფილი მოადგილე გია ლორთქიფანიძე ე.წ. 26 მაისის საქმეზე დაკითხვაზე დაიბარეს

2016-09-20 15:27:54, 1519 ნახვა

სამართალი

საქართველოს მთავარმა პროკურატურამ ე.წ. 26 მაისის საქმეზე, შს მინისტრის ყოფილი მოადგილე და ამჟამად ოდესის პოლიციის უფროსი გია ლორთქიფანიძე დაკითხვაზე დაიბარა.

როგორც უწყებაში გამართულ ბრიფინგზე პროკურორმა ჯარჯი წიკლაურმა განაცხადა, მას მიეცა გონივრული ვადა, რათა საგამოძიებო ორგანოში გამოცხადდეს.

წიკლაურის ინფორმაციით, დაკითხვაზე დაბარების უწყება მის ოჯახს ჩაბარდა, გონივრული ვადა კი 2 დღეა, რათა გია ლორთქიფანიძე პროკურატურაში გამოცხადდეს.

კითხვაზე, იმყოფება თუ არა ლორთქიფანიძე საქართველოში, პროკურორმა აღნიშნა, რომ მათ ხელთ არსებული ინფორმაციით, ამჟამად ის ქვეყანაში არ იმყოფება.

ცნობისთვის, პროკურატურამ 2011 წლის 26 მაისს, რუსთაველის გამზირზე მომიტინგეთა დარბევისა და მასობრივი დაკავების ფაქტზე ხელისუფლების ყოფილ მაღალჩინოსნებს - დათა ახალაიას, ვასილ ლელუაშვილს, რევაზ შიუკაშვილს და ლევან ქარდავას ბრალი წარუდგინა.

როგორც უწყების განცხადებაშია აღნიშნული, პროკურატურამ აქამდე უცნობი ვიდეოკადრები მოიპოვა, რომელშიც ასახულია, როგორ გასცემს 2011 წლის 26 მაისს დანაშაულებრივ ბრძანებას დათა ახალაია, რომელიც ითხოვს ყველა მომიტინგის დაკავებას.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან