სერჟ სარგსიანმა არაღიარებული რესპუბლიკების, მათ შორის ე.წ. აფხაზეთის დელეგაციასთან ერთად ყარაბაღის „დამოუკიდებლობის დღე“ აღნიშნა

2016-09-02 14:55:53, 1153 ნახვა

სხვადასხვა

არაღიარებული მთიანი ყარაბაღის რესპუბლიკა "დამოუკიდებლობის დღეს" აღნიშნავს. როგორც ირკვევა, საზეიმო ღონისძიებებზე დასასწრებად ე.წ. დელეგაცია აფხაზეთიდანაც ჩავიდა.

„დელეგაციას" ე.წ. ვიცე-პრეზიდენტი ვიტალი გაბნია ხელმძღვანელობს. მან მთიანი ყარაბაღის ე.წ. პრეზიდენტ ბაკო სააკიანს მთიანი ყარაბაღის "დამოუკიდებლობის" 25 წელი მიულოცა.

აღნიშნულ ინფორმაციას აფხაზეთის ე.წ. პრეზიდენტის ადმინისტრაცია ავრცელებს.

”მთიანი ყარაბაღის მოსახლეობამ მთავარ მიზნამდე - რესპუბლიკის დამოუკიდებლობამდე მისაღწევად, ურთულესი გზა გაიარა. აფხაზებისთვის განსაკუთრებულად მნიშვნელოვანია ამ დღის მათთან ერთად აღნიშვნა”, -განაცხადა გაბნიამ.

როგორც გავრცელებული ინფორმაციით ხდება ცნობილი, საზეიმო ღონისძიებების ფარგლებში აფხაზეთის ე.წ. დელეგაცია „სამხრეთ ოსეთის“ და არაღიარებული დნესტრიპირეთის "დელეგაციებსაც" შეხვდა.

მთიანი ყარაბაღის "დამოუკიდებლობას" ზეიმობს სომხეთის პრეზიდენტი, სერჟ სარგსიანიც. პრეზიდენტი ყარაბაღში, გუშინ ჩავიდა.