ზურაბ პატარაძემ, ომში უგზო-უკვლოდ დაკარგულ მებრძოლთა ხსოვნას პატივი მოაგო

2016-08-30 14:52:15, 951 ნახვა

რეგიონი

აჭარის მთავრობის თავმჯდომარემ, ზურაბ პატარაძემ, დღეს ომში უგზო-უკვლოდ დაკარგულ მებრძოლთა ხსოვნას პატივი მოაგო. უგზო-უკვლოდ დაკარგული გმირების ხსოვნის დღისადმი მიძღვნილი ღონისძიება ჯავახიშვილისა და ლორიას ქუჩების მიმდებარედ არსებულ სკვერში გაიმართა.

როგორც "ექსპრესნიუსს" აჭარის მტავრობის პრესსამსახურმა აცნობა, სკვერში დაკარგულ მებრძოლთა ახლობლები და ნათესავები იმყოფებოდნენ. ღონისძიებას ქალაქ ბათუმის მერი, გიორგი ერმაკოვი და მთავრობის სხვა წევრებიც ესწრებოდნენ.

უგზო-უკვლოდ დაკარგულთა საერთაშორისო დღესთან დაკავშირებით ღონისძიებებს ორგანიზებას წითელი ჯვრის საერთაშორისო კომიტეტი და საქართველოს წამების მსხვერპლთა ფსიქო-სოციალური და სამედიცინო რეაბილიტაციის ცენტრი უწევს. ამ დღის მიზანია უგზო-უკვლოდ დაკარგულ პირთა პატივისცემა, მათი ოჯახების მხარდაჭერა და ფართო საზოგადოების იმ შედეგების შესახებ ინფორმირებაა, რაც ოჯახისთვის ადამიანის გაუჩინარებას მოაქვს.

ცნობისთვის, საქართველოში 1990-იანი წლებისა და 2008 წლის აგვისტოს ომის შედეგად 2 300-ზე მეტი პირი ითვლება დაკარგულად.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან