ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ გერმანიის ფედერაციულ რესპუბლიკაში, ქალაქ ბერლინში, კონრად ადენაუერის ფონდში გამართული რიგით მეხუთე საქართველო-გერმანიის სტრატეგიული ფორუმის მუშაობაში მიიღო მონაწილეობა.

სახელმწიფო მინისტრის აპარატის ინფორმაციით, ფორუმი გერმანიის ფედერაციულ რესპუბლიკაში საქართველოს საელჩოს, საქართველოში გერმანიის ფედერაციული რესპუბლიკის საელჩოსა და ატლანტიკური საბჭოს ორგანიზებით გაიმართა. ფორუმის სამუშაო სესიაზე: „გერმანიის ხედვა საქართველოში მიმდინარე ტრანსფორმაციისა და რეფორმების პროცესებზე“ სახელმწიფო მინისტრმა სიტყვით მიმართა ფორუმის მონაწილეებს. დავით ბაქრაძემ ასოცირებისა და მისივე შემადგენელი ევროკავშირთან თავისუფალი სავაჭრო სივრცის(DCFTA) შესახებ შეთანხმებების, ასევე, სავიზო რეჟიმის ლიბერალიზაციის სამოქმედო გეგმის ფარგლებში განხორციელებული, თუ მიმდინარე რეფორმების, დემოკრატიული ინსტიტუტების გასამტკიცებლად დაგეგმილი ღონისძიებების შესახებ ისაუბრა და ფორუმის მონაწილეების შეკითხვებსაც უპასუხა. დისკუსია ჩეთემჰაუსის ( Chatham house) ფორმატში გაიმართა.

ვიზიტის ფარგლებში სახელმწიფო მინისტრმა შეხვედრა გამართა ბუნდესტაგის ევროკავშირის საქმეთა კომიტეტის თავმჯდომარის მოადგილესთან ჰაინც-იოახიმ ბარხმანთან და კომიტეტის წევრებთან, ასევე, აღმოსავლეთ ევროპის, კავკასიისა და ცენტრალური აზიის საკითხებზე  გერმანიის ფედერაციული რესპუბლიკის საგარეო საქმეთა სამინისტროს საგანგებო დავალებათა ელჩთან ანდრეას პეშკესთან.

შეხვედრებზე მხარეებმა ევროკავშირსა და ნატო-ში საქართველოს ინტეგრაციის აქტუალურ საკითხებსა და პერპექტივებზე ისაუბრეს. ყურადღება გამახვილდა იმ რეფორმებზე, რომელსაც საქართველოს ხელისუფლება ასოცირების შეთანხმების  ფარგლებში ახორციელებს. აღინიშნა სავიზო რეჟიმის ლიბერალიზაციის სამოქმედო გეგმის შესრულების მიმართულებით საქართველოს მიერ დაფიქსირებული პროგრესი. ასევე, გერმანული მხარის წარმომადგენლება დაადასტურეს გერმანიის მთავრობის მზაობა ევროკავშირთან თავისუფალი სავაჭრო  სივრცის შესახებ (DCFTA) შეთანხმების ფარგლებში ეკონომიკური პროექტების განხორციელების ხელშეწყობის თაობაზე.

„შეხვედრების დროს ხაზგასმით აღინიშნა საქართველოში მიმდინარე იმ რეფორმების პოლიტიკური მხარდაჭერა, რომელსაც კონკრეტული სარგებელი მოაქვს საქართველოს მოქალაქეებისთვის, მათ შორის, უახლოეს მომავალში ვიზლიბერალიზაციის თვალსაზრისით“, - განაცხადა დავით ბაქრაძემ.

გერმანიის ფედერაციულ რესპუბლიკაში სახელმწიფო მინისტრის სამუშაო ვიზიტის ფარგლებში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ინიციატივით გამოცემული ინგლისურენოვანი წიგნის „საქართველოს ევროპული გზები“ პრეზენტაციაც გაიმართა.  საქართველოს საელჩოში მოწვეულ სტუმრებს კრებული ევროპულ დაევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ, საქართველოს ელჩმა ლადო ჭანტურიამ, ასევე, მწერალმა და წიგნის რედაქტორმა ზურაბ ქარუმიძემ წარუდგინეს.

ცნობისთვის, „საქართველოს ევროპული გზები“ ცნობილი ავტორების მიერ მომზადებული ესეების კრებულია, რომელიც მკითხველს  საქართველოს ევროპული კუთვნილების თავისებურებებს უზიარებს, ხსნის საქართველოს სწრაფვას დაუბრუნდეს ერთიან ევროპულ ოჯახს.წერილებში აღწერილია  ევროპის პოლიტიკურ-კულტურული და ესთეტიური კავშირები ქართულ საზოგადოებასთან. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს