საქართველოში საარსებო შემწეობის მიმღებთა რიცხვი კვლავ მცირდება. სოციალური მომსახურების სააგენტოს მონაცემებით, მხოლოდ ერთ თვეში 7,235 ადამიანს შეუწყდა საარსებო შემწეობის გადახდა.

2026 წლის ივნისში საარსებო შემწეობის მიმღებთა რაოდენობა 584,137 იყო, ხოლო ივლისში ეს მაჩვენებელი 576,902-მდე შემცირდა. წლიური დინამიკის თვალსაზრისით, ამ პერიოდში შემწეობის მიღება 130,915 ადამიანმა შეწყვიტა. შედარებისთვის, 2025 წლის ივლისში სახელმწიფოსგან ფინანსურ დახმარებას 707,817 სოციალურად დაუცველი მოქალაქე იღებდა.

მიმდინარე წლის ყოველთვიური მონაცემების გათვალისწინებით, იანვრიდან ივნისის ჩათვლით, შემწეობის მიმღებთა რაოდენობა ყოველთვიურად შემცირდა.

სოციალური დახმარების მიმღებთა რაოდენობას მიმდინარე წლის იანვრიდან ივლისის ჩათვლით:

იანვარი - 710,226 ადამიანი;
თებერვალი - 709,458 ადამიანი;
მარტი – 667,793 ადამიანი;
აპრილი – 645,920 ადამიანი;
მაისი – 605,033 ადამიანი;
ივნისი – 584,137 ადამიანი;
ივლისი – 576,902 ადამიანი.
პრემიერ-მინისტრმა ირაკლი კობახიძემ სოციალურად დაუცველი ოჯახების მონაცემთა ბაზაში რეგისტრირებული ადამიანების ე.წ. „გაბერილი“ რაოდენობა პირველად 2025 წლის 26 ნოემბერს გამოაცხადა. მაშინ პრემიერ-მინისტრმა განაცხადა, რომ „ამჟამად საქართველოში სოციალურ დახმარებას უფრო მეტი ადამიანი იღებს, ვიდრე ღარიბად ითვლება და ამიტომ ეს მაჩვენებელი გადახედვას საჭიროებს“.

წელს ხელისუფლებამ სიღარიბის შემწეობის მიმღები ოჯახების გადახედვისა და კრიტერიუმების შეცვლის შესახებ გამოაცხადა. როგორც ჯანდაცვის მინისტრმა მიხეილ სარჯველაძემ მაშინ განაცხადა, მიზეზი იყო იმის უზრუნველყოფა, რომ მონაცემთა ბაზაში მხოლოდ ის პირები შესულიყვნენ, რომლებსაც ნამდვილად ჰქონდათ სახელმწიფო ფინანსური დახმარების მიღების უფლება.

მოგვიანებით მთავრობამ შეცვალა სოციალურად დაუცველი ოჯახების მონაცემთა ბაზაში რეგისტრაციის წესები. მთავრობის ახალი დადგენილების თანახმად, სისტემა ახლა მკაცრ ფინანსურ ზღვარს მოიცავს, რაც ავტომატურად კრძალავს მაღალი შემოსავლის მქონე პირების დახმარებას.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

უკრაინამ პირველად გამოიყენა ბრიტანული დრონები რუსეთის სიღრმეში საჰაერო დარტყმებისთვის

რუსეთში იმპორტირებული ინდური ბენზინი რუსულ ბენზინზე ორჯერ ძვირი აღმოჩნდა

დეზინფორმაციული კამპანიით ცდილობენ ეჭვქვეშ დადგეს გელათის გადახურვის საკითხი – კომიტეტი

კობა ფარტენაძის თქმით, მას ბათუმში თავს კიდევ ერთხელ დაესხნენ