გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი ბრაზილიის ელჩს საქართველოში ოსვალდო ბიატო ჯუნიორს შეხვდა. ამის შესახებ ინფორმაციას ჯანდაცვის სამინისტრო ავრცელებს.

უწყების ცნობით, გაცნობითი ხასიათის შეხვედრაზე ყურადღება გამახვილდა კლიმატის მწვანე ფონდის (GCF) მხრიდან გაეროს კლიმატის ცვლილების ჩარჩო კონვენციის ფარგლებში შემუშავებული ეკონომიკური ინსტრუმენტის REDD+_ის დაფინანსების მოპოვების საკითხს, რაშიც ბრაზილიისთვის საქართველოს მხარდაჭერა მნიშვნელოვანი იქნება. საუბარი შეეხო კლიმატის მწვანე ფონდის (GCF) მმართველი ორგანოს 37-ე შეხვედრასაც, რომელიც თბილისში გაიმართება.

„ბრაზილიაში სატყეო სექტორში არსებული გამოწვევები საქართველოსთვის ნაცნობია, ვინაიდან წარსულში ჩვენც გვქონდა ანალოგიური მდგომარეობა, როდესაც ტყეების ჩეხას და მათ გამოყენებას პირადი მიზნებისთვის ხშირი ხასიათი ჰქონდა. ამ პრაქტიკის შესაცვლელად, არაერთი საკანონმდებლო ცვლილება განვახორციელეთ, ასევე მივიღეთ დაფინანსება კლიმატის მწვანე ფონდისგან. ამასთან ერთად, საქართველოს მთავრობა აქტიურად ახორციელებს ტყის მართვის ეფექტიანი მექანიზმების დანერგვას, რათა თავიდან ავიცილოთ ტყეების უკანონო ჩეხა”, - განაცხადა ნინო თანდილაშვილმა.

შეხვედრაზე მხარეებმა სოფლის მეურნეობის მიმართულებით ორ ქვეყანას შორის თანამშრომლობის გაღრმავების პერსპექტივებზეც იმსჯელეს.

როგორც გარემოს დაცვისა და სოფლის მეურნეობის მინისტრის პირველმა მოადგილემ აღნიშნა, საქართველო ისწრაფვის ევროკავშირში ინტეგრაციისკენ, თუმცა, ამავე დროს, ძალიან მნიშვნელოვანია პარტნიორ ქვეყნებთან  თანამშრომლობის გაღრმავება.

ბრაზილიის ელჩმა საქართველოში ოსვალდო ბიატო ჯუნიორმა ყურადღება გაამახვილა სოფლის მეურნეობის მიმართულებით ორ ქვეყანას შორის თანამშრომლობის მნიშვნელობის საკითხებზე, მათ შორის, სასოფლო-სამეურნეო პროდუქტების ექსპორტ-იმპორტის გაზრდის შესაძლებლობებზე.

შეხვედრას გარემოს დაცვისა და სოფლის მეურნეობის სამინისტროს შესაბამისი სამსახურების წარმომადგენლები ესწრებოდნენ.

ავტორი: NS (სტატია დაფინანსებულია),

სოციალური ქსელები

აზერბაიჯანელმა პოლიტპატიმრებმა ფონ დერ ლაიენს ბაქოში ვიზიტის დროს ადამიანის უფლებების საკითხების წამოჭრისკენ მოუწოდეს

რუსეთის ელიტა ომის ესკალაციისთვის ემზადება უკრაინის მიერ რუსეთის სიღრმეში თავდასხმების შემდეგ - The Washington Post

ცოტნე ივანიშვილი პარლამენტში ცემა-ტყეპაზე - ხელი როგორ მოხვდა, რა ფორმით მოხდა, რა სიძლიერით მოხვდა, ამის ზომვა როგორ უნდა დავიწყოთ?

ოლიგარქის ვაჟს ცოტნე ივანიშვილს ოცნების ახალგაზრდული ორგანიზაცია აბარია და ამბობს რომ პოლიტიკაში ჩართვის ინტერესი არ აქვს