2023-05-08 13:08:37, 1456 ნახვა

---

კანონპროექტით, ცესკო-ს თავმჯდომარის შერჩევის და წარდგენის უფლებამოსილება, პრეზიდენტის ნაცვლად, პარლამენტის თავმჯდომარეს ექნება

ცენტრალური საარჩევო კომისიის თავმჯდომარეობისა და ე.წ. პროფესიული წევრობის კანდიდატების შერჩევის და საკანონმდებლო ორგანისთვის წარდგენის უფლებამოსილება პრეზიდენტის ნაცვლად, პარლამენტის თავმჯდომარეს ექნება. ცვლილებები, რომელიც აღნიშნულს ითვალისწინებს და რომელთა ინიციატორებიც "ქართული ოცნების" დეპუტატები არიან, „საარჩევნო კოდექსსა“ და რეგლამენტში შედის.

კანონპროექტის თანახმად, პარლამენტის თავმჯდომარე ცესკო-ს თავმჯდომარისა და წევრების შესარჩევ კონკურს გამოაცხადებს, საკონკურსო კომისიას შექმნის და კანდიდატურებს საკანონმდებლო ორგანოს წარუდგენს. საკონკურსო კომისიის შემადგენლობაში პრეზიდენტის მხოლოდ ერთი წარმომადგენელი იქნება.

კანონპროექტის მიხედვით, იცვლება არჩევასთან დაკავშირებული პროცედურა და კვორუმი. კერძოდ, თუ პარლამენტი ცესკო-ს თავმჯდომარესა და წევრებს სრული შემადგენლობის უმრავლესობით (76 ხმით) მხარს დაუჭერს, ისინი თანამდებობას 5 წლის ვადით დაიკავებენ.

მოქმედი კანონმდებლობის მიხედვით, ცესკო-ს თავმჯდომარეობისა და წევრობის კანდიდატები პარლამენტს ასარჩევად პრეზიდენტმა უნდა წარუდგინოს, რის შემდეგაც საკანონმდებლო ორგანოს პლენარულ სხდომაზე, ცესკო-ს თავმჯდომარის და წევრების ასარჩევად, კენჭისყრა თავდაპირველად 2/3-იანი კვორუმით ტარდება. იმ შემთხვევაში, თუ ცესკო-ს თავმჯდომარის 2/3-ით არჩევა ვერ ხდება, კენჭისყრა სრული შემადგენლობის უმრავლესობით იმართება.

2/3-იანი კვორუმით არჩეული ცესკო-ს თავმჯდომარე თანამდებობას 5 წლის, ხოლო უმრავლესობით დამტკიცებული 6 თვის ვადით იკავებს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი