მსოფლიო ლიდერებმა იორდანიელი მფრინავის მკვლელობა დაგმეს

2015-02-04 11:00:00, 2570 ნახვა

მსოფლიო

იორდანიელი მფრინავის მოაზ ალ კასასბის მკვლელობა ამერიკის შეერთებული შტატების პრეზიდენტმა ბარაკ ობამამ დაგმო.

როგორც ობამამ იორდანიის მეფე აბდალა მეორესთან შეხვედრის შემდეგ განაცხადა, იორდანიელი მფრინავის ვერაგული მკვლელობა ისლამური სახელმწიფოს განადგურების მზაობას მხოლოდ გაზრდის.

ობამამ გარდაცვლილის ოჯახს, იორდანიის ხალხს და მთავრობას სამძიმარი გამოუცხადა.

იორდანიელი მფრინავის მკვლელობა გაერო-ს უშიშროების საბჭომაც დაგმო.

„ტერორიზმისგან მთელი მსოფლიო ზარალდება. მთელი მსოფლიო უნდა დადგეს იორდანიის გვერდით, რათა ტერორიზმის საფრთხე აღმოიფხვრას“, - ნათქვამია საბჭოს განცხადებაში.

მფრინავის მკვლელობა გაერთიანებული სამეფოს პრემიერ-მინისტრმა დევიდ ქემერონმა, გერმანიის კანცლერმა ანგელა მერკელმა და გაერო-ს გენერალურმა მდივანმა ბან კი მუნმაც დაგმეს.

ცნობისთვის, იორდანიელი მფრინავი მოაზ ალ კასასბი ტერორისტებმა 2014 წლის დეკემბერში დაატყვევეს, როდესაც მისი F16 სირიაში ჩამოვარდა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან