გივი სანიკიძე: განცხადება, რომ თელასმა 800 მილიონი ლარი მოსახლეობისგან ამოიღო, ჰაერიდან მოტანილია

2015-08-14 14:27:57, 796 ნახვა

ეკონომიკა

„განცხადება, რომ თელასმა 800 მილიონი ლარი მოსახლეობისგან ამოიღო, ჰაერიდან მოტანილია“, – ამის შესახებ სემეკის წარმომადგენელმა გივი სანიკიძემ ჟურნალისტებს კომიისიის საჯარო სხდომის დასრულების შემდეგ განუცხადა.
მისივე თქმით, სხდომაზე „ქართული დასის“ წარმომადგენლის ჯონდი ბაღათურიას მიერ დასახელებული ციფრები არგუმენტს მოკლებულია და დღევანდელ განსახილველ საკითხთან კავშირი არ აქვს.
„სხდომაზე გაკეთდა განცხადება, რომ მაშინ, როდესაც მოხდა თელასის პრივატიზაცია, მას 800 მილიონი ლარის მოთხოვნის უფლება გადაეცა. შესაბამისად, ჯონდი ბაღათურია ამტკიცებდა, რომ თელასმა 800 მილიონი ლარი ამოიღო მოსახლეობიდან, რაც სრულიად უსაფუძვლო განცხადებაა. ეს ციფრები ჰაერიდან არის მოტანილი. ჩვენ გვაქვს ყოველი წლის აუდიტორული აქტები და აუდიტორები ამ შემთხვევაში არიან „დიდი ოთხეულის“ წარმომადგენლები. თუ ვინმეს აქვს კომპეტენცია, რომ ეჭვი შეიტანოს „დიდი ოთხეულის“ დასკვნებში, ეს უკვე მისი პრობლემაა. 1999 წლის აუდიტის აქტით ჩანს, რომ „თელასს“ მოკლევადიანი მოთხოვნები ანუ, მისაღები დავალიანების თანხები ელექტროენერგიის ნაწილში არის 22 მილიონი ლარი. გრძელვადიანი მოთხოვნები კი, მხოლოდ 36 მილიონი ლარი. შესაბამისად 800 მილიონი არის სრულიად უსაფუძვლო ციფრი, რომელსაც არგუმენტი არ გააჩნია“, – აღნიშნა სანიკიძემ.
ამასთან, სემეკის წარმომადგენლის განმარტებით, დავალიანებების საკითხი კავშირში საერთოდ არ არის კაპიტალურ დანახარჯებთან და შესაბამისად ელექტროენერგიის ტარიფებთან.
ცნობისთვის, ენერგეტიკისა და წყალმომარაგების მარეგულირებელმა ეროვნულმა კომისიამ თელასის კაპიტალური დანახარჯები 36,358. 209 ლარით განსაზღვრა.
სემეკმა თელასის დანახარჯების შესახებ ინფორმაცია დღევანდელ საჯარო განხილვაზე წარმოადგინა.
როგორც სემეკში აცხადებენ ეს ციფრები წინასწარი გაანგარიშების შედეგად მიიღეს.