თურნავა - ტანაპისა და ტაპის პროექტებამდე საქართველოს სატრანზიტო ფუნქცია მხოლოდ რეგიონალური დონის იყო, ახლა ჩვენ საერთაშორისო მოთამაშეები ვართ

2020-02-29 11:00:22, 3309 ნახვა

ეკონომიკა

„მისასალმებელია, რომ სამხრეთ გაზის კორიდორი დღესდღეობით საერთაშორისოდ აღიარებულია არა მხოლოდ მონაწილე ქვეყნების, არამედ ევროკავშირის ქვეყნების მიერ, - ამის შესახებ ეკონომიკისა და მდგრადი განვითარების მინისტრმა ნათია თურნავამ ბაქოში, სამხრეთ გაზის კორიდორის მრჩეველთა საჭოს მინისტერიალზე სიტყვით გამოსვლისას განაცხადა. მინისტერიალი აზერბაიჯანის რესპუბლიკის პრეზიდენტმა ილჰამ ალიევმა გახსნა.

როგორც თავის გამოსვლაში ნათია თურნავამ აღნიშნა, მინისტერიალის ბოლო შეკრების შემდეგ, დღეს უკვე რეალობაა, რომ სამხრეთ გაზის კორიდორის პროექტი განვითარდა და დიდ პროგრესს მიაღწია.

მისივე თქმით, კორიდორის სამშენებლო სამუშაოები ასი პროცენტით დასრულებულია აზერბაიჯანსა და საქართველოში, თურქეთში კი სრულად არის შესრულებული ინფრასტრუქტული სამუშაოები.

„2019 წლის დეკემბერში ტანაპის პროექტის დაწყებამ ხაზი გაუსვა გაზის ტრანზიტის მნიშვნელოვან მოვლენას. მოგეხსენებათ, პროექტის ინაუგურაციას დაესწრო საქართველოს პრემიერ-მინისტრი, რომელმაც განაცხადა, რომ ამ მოვლენით იწყება ახალი ერა ენერგოუსაფრთხოებაში. ტანაპისა და ტაპის პროექტებამდე საქართველოს სატრანზიტო ფუნქცია მხოლოდ რეგიონალური დონის იყო, ახლა ჩვენ წარმოდგენილები ვართ როგორც საერთაშორისო მოთამაშეები. მოხარული ვარ, რომ ჩემს ქვეყანას კიდევ ერთი შესაძლებლობა აქვს მოახდინოს საკუთარი როლის მნიშვნელობის დემონსტრირება ამ კონტექსტში", - განაცხადა ნათია თურნავამ.

მისივე თქმით, სამხრეთ გაზის დერეფნის პროექტის წარმატება კიდევ ერთხელ ხაზს უსვამს სახელმწიფოების ერთობლივი ძალისხმევის როლს ასეთი მნიშვნელობის საერთაშორისო პროექტების შემუშავებისას.

„მტკიცედ მჯერა, რომ ჩვენი საერთო ინტერესის შესრულება დაგვეხმარება იმ გამოწვევების გადალახვაში, რომლებიც ქმნიან წინაღობას რეგიონსა და ევროკავშირს შორის დამოუკიდებელი და სტაბილური ენერგიის ნაკადის მიწოდებისთვის", - აღნიშნა ნათია თურნავამ.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),