ჩვენ უნდა გავამრავლოთ მეგობრები, მხარდამჭერები და გავთიშოთ მტრები, - ამის შესახებ საქართველოს პრეზიდენტმა გიორგი მარგველაშვილმა გორში თავდაცვის აკადემიის იუბილისადმი მიძღვნილ ღონისძიებაზე სიტყვით გამოსვლისას განაცხადა.

„ 22 წელია, რაც აღდგა ძალიან მნიშვნელოვანი სტრუქტურა, რომელიც უზრუნველყოფს ჩვენი შეიარაღებული ძალების სიმტკიცეს, მის ინტელექტუალურ გაძლიერებას, რომელიც ქმნის ქართულ არმიას. თქვენ ღირსებით ატარებთ იუნკერების გმირულ სახელს. მადლობა იმისთვის, რომ აგრძელებთ იმ ტრადიციებს, რომელსაც პირველივე ქართული რესპუბლიკის შექმნისას ჩაეყარა საფუძველი. ამავე დროს, თქვენი სასწავლებელი ატარებს დავით აღმაშენებლის სახელს, რომელმაც საქართველოს უმძიმეს ვითარებაში, სწორედ სამხედრო გამარჯვებების შედეგად, სიძლიერე და სტაბილურობა მოუტანა. დავით აღმაშენებლის სამხედრო მიღწევებს მსოფლიოში ასწავლიან და სწავლობენ. ჩვენ უნდა გვახსოვდეს, რომ ის სიმტკიცე, რომელსაც აქ ვქმნით, რეგიონის სტაბილურობისა და სიძლიერის გარანტიაა. დიდგორის ბრძოლა, რომელიც ბევრი სამხედრო სტრატეგისთვის სახელმძღვანელო გახდა, არის ის, რასაც სწავლობთ თქვენ და სწავლობენ სხვებიც, მაგრამ არ იქნება სწორი, დიდგორის ბრძოლა შევისწავლოთ მხოლოდ იმ დღის კონტექსტში, როცა ის მოხდა. ჩვენ უნდა ვისწავლოთ ჩვენი დიდი წინაპრისგან. ჩვენ უნდა დავინახოთ ის მთავარი გადაწყვეტილები, რომლებიც მაშინ იქნა მიღებული. რას აკეთებდა ჩვენი დიდი წინაპარი? ის ამრავლებდა მეგობრებს და ცდილობდა, გაეთიშა თავისი მტრები. ამ დიდი წინაპრის გაკვეთილებით უნდა ვიმოქმედოთ ყველამ, იქნება ეს რიგითი ჯარისკაცი, ოფიცერი თუ პოლიტიკოსი. ჩვენ უნდა გავამრავლოთ ჩვენი მეგობრები, მხარდამჭერები და გავთიშოთ მტრები. ამას ემსახურება ის დიდი პროფესიონალიზმი, რომელსაც თქვენ ეუფლებით. ამ მიზნისკენ არის ორიენტირებული ჩვენი სახელმწიფო“, - განაცხადა პრეზიდენტმა.

ამასთან, პრეზიდენტმა მადლობა გადაუხადა თავდაცვის აკადემიის კურსდამთავრებულებს და ყველა სამხედრო პირს, რომელმაც საფუძველი ჩაუყარა  22 წლის წინ თავდაცვის აკადემიაში დაწყებულ საქმიანობას.

„მადლობა მინდა გადავუხადო ყველას, ვინც 22 წლის წინ ჩაუყარა საფუძველი ამ საქმიანობას, მონაწილეობა მიიღო თქვენი პროფესიონალიზმის ამაღლებაში. მადლობა მინდა გითხრათ თქვენ, რადგან აირჩიეთ უმნიშვნელოვანესი პროფესია, სამშობლოს დაცვა. მინდა მოგილოცოთ დღევანდელი წარმატება, მომავალი გამარჯვების იმედით და გითხრათ, რომ თითოეული მოქალაქე, პატივს სცემს იმ მუნდირს, რომელსაც თქვენ ღირსეულად ატარებთ. ღმერთი ფარავდეს საქართველოს“,-აღნიშნა გიორგი მარგველაშვილმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია