გუდაურში საბაგირო მწყობრიდან გამოვიდა - დაშავდა 10 ადამიანი (ვიდეო)

2018-03-16 18:30:07, 3165 ნახვა

საზოგადოება

გუდაურში საბაგირო მწყობრიდან გამოვიდა, რის შედეგადაც 10 ადამიანი დაშავდა. საბაგიროს ხაზი საპირისპირო მიმართულებით დატრიალდა და რამდენიმე ადამიანი გონდოლიდან ჩამოვარდა.

როგორც „ექსპრესნიუსს“ ჯანდაცვის სამინისტროს პრესსამსახურში განუცხადეს, ადგილზე სასწრაფო დახმარების 3 ეკიპაჟი მუშაობდა. პირველადი დახმარების გაწევის შემდეგ, ეკიპაჟებმა დაშავებულები გუდაურის ამბულატორიაში გადაიყვანეს.

ინციდენტის შემდეგ ადგილზე პირველი ვიცე-პრემიერი, ეკონომიკის მინისტრი დიმიტრი ქუმსიშვილი ჩავიდა. როგორც მან განაცხადა, ხელისუფლება ყველაფერს გააკეთებს, რათა დაშავებული მოქალაქეების უსაფრთხოება უზრუნველყოფილი იყოს. მანვე აღნიშნა, რომ საბაგიროს მწყობრიდან გამოსვლის მიზეზების დასადგენად ქვეყანაში საერთაშორისო ექპერტები ჩამოვლენ. რაც შეეხება პასუხისმგებლობის საკითხს, ქუმსიშვილის თქმით, უმკაცრესად დაისჯება ყველა, ვინც მომხდარ შემთხვევაში დამნაშავედ გამოვლინდება.

მოგვიანებით, 7 მოქალაქის თბილისში გადმოყვანა გადაწყდა. თავდაპირველად ვერტმფრენით, ღუდუშაურის სახელობის კლინიკაში უკრაინის ერთი მოქალაქე გადმოიყვანეს. კიდევ 6 ტურისტის გადმოყვანა რეანომობილებით განხორციელდა. ამ ეტაპზე, ერთ დაშავებულს ოპერაცია უტარდება, დანარჩენების მდგომარეობა კი, დამაკმაყოფილებელია. მათ სიცოცხლეს საფრთხე არ ემუქრება.

მომხდართან დაკავშირებით გამოძიება სსკ-ის 275-ე მუხლით მიმდინარეობს, რაც ექსპლუატაციის წესების დარღევას გულისხმობს.

ცნობისთვის, საბაგიროს, რომელიც გუდაურში მწყობრიდან გამოვიდა ინსპექტირება 2017 წლის 22 დეკემბერს კომპანია "CA International"-მა ჩაუტარა. კომპანიის დირექტორის სანდრო შელიას განცხადებით, საბაგირო იდეალურ მდგომაროებაში იყო და არანაირი შეუსაბამობა არ დაფიქსირებულა.

მომხდართან დაკავშირებით განცხადება სს „ენერგო-პრო ჯორჯიამაც“ გაავრცელა. კომპანიის ინფორმაციით, გუდაურის საკურორტო ზონაში, ქსელში არანაირი ავარიული გათიშვა, ძაბვის პარამეტრების ცვალებადობა ან რაიმე სახის სხვა შეფერხება არ ყოფილა.

updated at 18:00 pm