2017-04-11 20:10:56, 2677 ნახვა
მსოფლიო
სტოკჰოლმში მომხდარ ტერაქტში ეჭვმიტანილმა დანაშაული აღიარა
7 აპრილს, სტოკჰოლმში მომხდარ ტერაქტში ეჭვმიტანილმა უზბეკმა რახმატ აკილოვმა ჩადენილი დანაშაული აღიარა, - ამის შესახებ BBC იუწყება.
ბრალდებულის ადვოკატის განცხადებით, ეჭვმიტანილი მზადაა ციხეში წასასვლელად.
სამართალდამცველების ინფორმაციით, 39 წლის აკილოვი ტერორისტული დაჯგუფება „ისლამური სახელმწიფოს“ მომხრეა.
როგორც სამართალდამცავ ორგანოში აცხადებენ, აკილოვმა 2014 წელს შვედეთს თავშესაფრის მოთხოვნით მიმართა, რაზეც უარი მიიღო. მას ქვეყნის ტერიტორია 4 კვირის განმავლობაში უნდა დაეტოვებინა, თუმცა აკილოვი შვედეთში დარჩა და მიიმალა.
შეგახსენებთ, რომ 7 აპრილს თავდასხმა ქალაქის ცენტრალურ უბანში მოხდა, სადაც თავდამსხმელი სატვირთო მანქანით ქვეითად მოსიარულეებს დაეჯახა. შემთხვევის შედეგად 4 ადამიანი დაიღუპა.
ავტორი: ირაკლი მანაგაძე , ექსპრესნიუსის რეპორტიორი 2009 წლიდან
epn.ge (@expressnews.ge)
