სომეხთა სათვისტომომ საგარეო უწყებასთან აზერბაიჯანის საელჩოს ქვეყნის შიდა საქმეებში ჩარევა გააპროტესტა

2017-02-27 17:58:41, 2820 ნახვა

პოლიტიკა

თბილისში საგარეო საქმეთა სამინისტროს წინ საქართველოს სომეხთა სათვისტომოს მიერ ორგანიზებული საპროტესტო მანიფესტაცია გაიმართა. საპროტესტო აქციის მონაწილე საქართველოს მოქალაქეებმა აზერბაიჯანის საელჩოს ქვეყნის შიდა საქმეებში უხეში ჩარევა და ამ საკითხთან მიმართებაში ხელისუფლების დუმილი გააპროტესტეს.

მათი განცხადებით, საქართველოში უცხო ქვეყნის წარმომადგენლობა (აზერბაიჯანის საელჩო) დაუფარავად ცდილობს ქვეყანაში ეროვნულ ნიადაგზე შუღლი გააღვიოს და არმენოფობიის ექსპორტირება მოახდინოს, ამავე დროს საქართველოს ხელისუფლება საელჩოს ამ საქამიანობასთან დაკავშირებით არანაირ, კანონით გათვალისწინებულ ნაბიჯებს არ დგამს.

საპროტესტო აქციის მონაწილეებმა რუსთაველის გამზირზე მსვლელობა გამართეს. მანიფესტანტები სკანდირებდნენ ლოზუნგებს „დაიცავი საქართველო“, „სტოპ ალიევი“, „სტოპ პანთურკიზმი“ და ა.შ. პარლამენტის ყოფილი შენობისა და უშიშროების საბჭოს გავლით აქციის მონაწილეებმა საგარეო საქმეთა სამინისტროს მიუახლოვდნენ, სადაც ხანმოკლე აქცია გამართეს და ეროვნულ ნიადაგზე შუღლის გაღვივებაზე საქართველოში აზერბაიჯანის საელჩოს საქმიანობა დაგმეს.

აქციის დასასრულს საქართველოს სომეხთა სათვისტომოს წარმომადგენლებმა საგარეო საქმეთა სამინისტროს კანცელარიაში, მინისტრის სახელზე მიმართვა ჩააბარეს.

„მიუღებლად მიგვაჩნია ის დამკვიდრებული რეალობა, რომ უცხო სახელმწიფოს საელჩო ჩვენ ქვეყანაში -მოქალაქეების შორის შუღლისა და სიძულვილის ჩაგდებაზე მიმართულ გეგმას ახორციელებს და ამავე დროს იმ სახელმწიფოს ხელისუფლება, რომლის მოქალაქეებიც ვართ ჩვენ, ხელისუფლება, რომელიც წესი და რიგით ქვეყანაში სტაბილურობის შენარჩუნებაზე და კონფლიქტების არდაშვებაზე უნდა მუშაობდეს, ფაქტობრივად არ ახორციელებს არანაირ ქმედით ნაბიჯებს ამ მავნე საქმიანობის შესაჩერებლად და აზერბაიჯანის საელჩოს საქმიანობის საქართველოში მოქმედ კანონმდებლობის, ასევე საერთაშორისო სამართლის ნორმებთან შესაბამისობაში მოსაყვანად.

მოგმართავთ თხოვნით საერთაშორისო სამართლის ნორმების შესაბამისად კონკრეტული ქმედებები გადადგათ და საქართველოს სტრატეგიულ პარტნიორად წოდებულ აზერბაიჯანს აუკრძალოთ საქართველოს მოქალაქეთა ჯგუფებს შორის შუღლის ჩაგდებაზე მიმართულ ღონისძიებების ინიციირება და ხეშეწყობა“, -ნათქვამია საქართველოს სომეხთა სათვისტომოს მიმართვაში.