ზურაბ პატარაძემ ბათუმის ბულვარის ახალი ხელმძღვანელი წარადგინა

2017-01-10 15:11:56, 912 ნახვა

რეგიონი

აჭარის მთავრობის თავმჯდომარემ ზურაბ პატარაძემ ბათუმის ბულვარის უფროსის თანამდებობაზე ეთერ მაჭუტაძე დღეს წარადგინა.

ზურაბ პატარაძემ ბულვარის ადმინისტრაციის ყოფილ ხელმძღვანელს ცისკარ გოგიტიძეს გაწეული მუშაობისთვის მადლობა გადაუხადა და შემდგომ საქმიანობაში წარმატებები უსურვა.

შეხვედრაზე ზურაბ პატარაძემ ეთერ მაჭუტაძის გამოცდილებას გაუსვა ხაზი. აღნიშნა, რომ ის არის ეფექტური მენეჯერი, რაც ძალიან მნიშვნელოვანია ბულვარის განვითარებისათვის.

,,დღეს ჩვენ წარვადგინეთ ბულვარის ახალი ხელმძღვანელი, ქალბატონი ეთერ მაჭუტაძე. ის ძალიან გამოცდილი კადრია, ეფექტური მენეჯერი. დარწმუნებული ვარ ჩვენი რეგიონის, ჩვენი ქალაქის და ბულვარის საკეთილდღეოდ ქალბატონი ეთერი 24 საათიან რეჟიმში იმუშავებს და დაუღალავი შრომით ძალიან ბევრს გააკეთებს. ბულვარი ჩვენთვის სტრატეგიულად მნიშვნელოვანი ობიექტია. ეს არის ჩვენთვის სავიზიტო ბარათი და წარმატების ერთ-ერთი უმნიშვნელოვანესი ობიექტი", - აღნიშნა ზურაბ პატარაძემ ეთერ მაჭუტაძის წარდგენისას .

ეთერ მაჭუტაძე გამოცდილი და კვალიფიციური სპეციალისტია. აგრარულ მეცნიერებათა დოქტორი 2012 წლიდან დღემდე მუშაობდა ააიპ "ბათუმის გამწვანებისა და ლანდშაფტური დაგეგმარების სამსახურის" დირექტორად.

ეთერ მაჭუტაძეს დამთავრებული აქვს ვორონეჟის სატყეო-ტექნოლოგიური ინსტიტუტის სატყეო საინჟინრო მეტყევე-ინჟინერის სპეციალობით . წლების განმავლობაში მუშაობდა ბათუმის ბოტანიკური ბაღის მთავარ აგრონომად, შემდეგ კი დირექტორად.

ეთერ მაჭუტაძე არის 25-მდე სამეცნიერო პუბლიკაციისა და ნაშრომის ავტორი, რაც წლების განმავლობაში ქვეყნდებოდა სხვადასხვა სამეცნიერო ჟურნალ-გაზეთებში ქართულ და რუსულ ენებზე.