დავით უსუფაშვილი: პარლამენტში პრეზიდენტის გამოსვლის ფორმატზე შევჯერდებით

2015-02-09 17:29:14, 800 ნახვა

პოლიტიკა

პარლამენტში პრეზიდენტის გიორგი მარგველაშვილის გამოსვლის ფორმატთან დაკავშირებით საპარლამენტო უმრავლესობა და უმცირესობა კონსულტაციებს გამართავს.

ამის შესახებ პარლამენტის თავჯდომარე დავით უსუფაშვილმა ჟურნალისტებს განუცხადა.

„პრეზიდენტის პარლამენტში გამოსვლა 18 მარტს შედგება. ეს არის ის დრო, როდესაც მეც პარლამენტში ვარ, იმიტომ, რომ ერთ-ერთი სასესიო კვირის განმავლობაში მე არ ვიქნები საქართველოში და მე მსურს, ვუმასპინძლო პრეზიდენტს. პრეზიდენტიც, ასევე, დაკავებულია სხვა დღეებში. რაც შეეხება გამოსვლის ფორმატს და სხვა დეტალებს, ჩვენ ამაზე შევჯერდებით მას შემდეგ, რაც შეიკრიბება პარლამენტი, იქნება კონსულტაციები უმცირესობასა და უმრავლესობას შორის და მოვემზადებით ამ დღის ღირსეულად ჩასატარებლად“,- აღნიშნა უსუფაშვილმა.

მისივე თქმით, მომდევნო პლენარული სხდომების კვირას პარლამენტი მიმდინარე დღის წესრიგის მიხედვით იმუშავებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან