„დაემგზავრე ტექნოლოგიებს“ - ტექნობასის ახალი იდეა

2018-12-17 18:40:28, 6974 ნახვა

High - Tech

„დაემგზავრე ტექნოლოგიებს“ - ეს „ტექნობასის“ახალი იდეაა, რომელიც მთელს საქართველოში მოგზაურობს. ტექნობასი ბრენდირებული ავტობუსია, რომელსაც სტარტაპერები ქირაობენ იმისთვის, რომ რეგიონებში იარონ და ინტერაქტიური პრეზენტაციებისა და თამაშების გზით სხვადასხვა სკოლის მოსწავლეებს ინოვაციებისა და ტექნოლოგიების მიმართ ინტერესი გაუჩინონ.

პროექტის ავტორი სტარტაპ კომპანია "ლინგვინგია", რომელმაც იდეა ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს დახმარებით განახორციელა.

ეკონომიკის სამინისტროს ინოვაციებისა და ტექნოლოგიების სააგენტოს მთავარ ამოცანას წარმოადგენს ქვეყანაში ტექნოლოგიებისა და ინოვაციების პოპულარიზაცია, რაც შეიძლება მეტი ახალგაზრდის დაინტერესება ამ ერთიან ეკოსისტემაში მონაწილეობის მისაღებად. სწორედ აღნიშნულს წარმოადგენს ტექნოლოგიების ავტობუსი, რომელიც მოივლის მთელ საქართველოს ჩავა ყველა ადმინისტრაციულ ერთეულში და შეხვდება სკოლის მოსწავლეებს, რათა მათთვის მოხდეს იმ ახალი შესაძლებლობების გაცნობა", - განაცხადა ეკონომიკის სამინისტროს, ინოვაციებისა და ტექნოლოგიების სააგენტოს თავმჯდომარის მოვალეობის შემსრულებელმა ავთანდილ კასრაძემ.

ციფრულ სამყაროში ვცხოვრობთ და ამიტომ, ძალიან მნიშვნელოვანია ტექნოლოგიებზე ინფორმაციის გავრცელება, ასევე მნისვნელოვანია, რომ ამ ინფორმაციაზე წვდომა რეგიონში მცხოვრებ ბავშვებს ჰქონდეთ. ამიტომ ვუზიარებთ ჩვენს გამოცდილებას და ცოდნას. გამოხმაურება ამ პროექტს ძალიან კარგი აქვს", - აღნიშნა სტარტაპ კომპანია "ლინგვინგის" ერთ-ერთმა დამფუძნებელმა დავით ველიაშვილმა.

"ტექნობასმა" მოირა ქუთაისის, სამტრედიის, წყალტუბოს, თერჯოლის, ზესტაფონისა და კახეთის სკოლები. პროექტის ორგანიზატორებმა ტექნოლოგიური სიახლეები და ინოვაციური უკვე 2000-ზე მეტ ახალგაზრდას გაუზიარეს.

სამომავლოდ პროექტის ორგანიზატორები რეისების დამატებასა და ლოკაციების გაფართოებასაც გეგმავენ.