გერმანიის ახალი შს მინისტრი: გერმანია კრიმინალების მიმართ ნულოვანი ტოლერანტობის პოლიტიკას გაატარებს

2018-03-11 15:47:32, 2646 ნახვა

მსოფლიო

გერმანია კრიმინალების მიმართ ნულოვანი ტოლერანტობის პოლიტიკას გაატარებს. ამის შესახებ გერმანიის ახალმა შინაგან საქმეთა მინისტრმა ჰორსტ ზეეჰოფერმა განაცხადა.

გერმანული გამოცემა Spiegel-ის ცნობით, მინისტრმა თავშესაფრის მინიჭებისა და თანმიმდევრული დეპორტაციის პროცედურების დაჩქარების გენერალური გეგმის შესახებ ისაუბრა.

ზეეჰოფერის თქმით, ის აღნიშნული გეგმის განხორციელებას თანამდებობაზე ოფიციალურად დანიშვნისთანავე შეუდგება.

„თანამდებობის დაკავების შემდეგ მე შევკრებ შს სამინისტროს თანამშრომლებს, რათა შევიმუშაოთ თავშესაფრის მოთხოვნის განაცხადების დაჩქარებული განხილვისა და შემდგომი გაძევების სტრატეგია. დეპორტაციის შემთხვევები მნიშვნელოვნად უნდა გაიზარდოს. ჩვენ განსაკუთრებით მკაცრად უნდა ვიმოქმედოთ დამნაშავეებსა და პოტენციურ ტერორისტებთან მიმართებაში“,- აღნიშნა ჰორსტ ზეეჰოფერმა.

მინისტრმა თავშესაფრის მინიჭებისა და თანმიმდევრული დეპორტაციის პროცედურების დაჩქარების გენერალური გეგმის შესახებაც ილაპარაკა.

"ლტოლვილის სტატუსის მოთხოვნის რაოდენობა ქართველების მხრიდან გაზრდილია და ეს რა თქმა უნდა, შემაშფოთებელია. საქართველოს მთავრობამ ეს იცის და აკეთებს ყველაფერს, რათა უფრო არ გაიზარდოს ეს მოთხოვნა. ჩვენ კმაყოფილები ვართ საქართველოს მთავრობასთან თანამშრომლობით. სხვა ქვეყნებთან და კომისიაშიც ვიმსჯელებთ ამ საკითხებზე იმ შემთხვევაში, თუ ვითარება ასე გაგრძელდა", - განაცხადა გერმანიის შს მინისტრმა.

ამავე დროს, გერმანიის ახალმა შს მინისტრმა განაცხადა, რომ გერმანიას სურს დარჩეს კოსმოპოლიტურ და ლიბერალურ ქვეყნად.

„თუმცა როდესაც საქმე მოქალაქების დაცვას ეხება, საჭიროა ძლიერი სახელმწიფო. მე ამაზე ვიზრუნებ“, – განაცხადა ზეეჰოფერმა.

14 მარტს გერმანიის ბუნდესტაგი ახალ კანცლერს აირჩევს. ამავე დღეს ახალი მინისტრთა კაბინეტი ფიცს დადებს და მთავრობა მოვალეობის შერსულებას ოფიციალურად შეუდგება.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები