აშშ-ის საელჩო იერუსალიმში მაისში გაიხსნება

2018-02-24 13:41:37, 2809 ნახვა

მსოფლიო

ამერიკის შეერთებული შტატების საელჩო იერუსალიმში მაისში გაიხსნება, - ამის შესახებ NewsWeek იუწყება.

როგორც ისრაელის ტრანსპორტისა და დაზვერვის მინისტრმა, ისრაილ კაცმა აღნიშნა, ამერიკის საელჩოს გახსნა იერუსალიმში, ისრაელის 70 წლის იუბილეს უკავშირდება, რომელიც 14 მაისს აღინიშნება.

მოგვიანებით მინისტრის აღნიშნული განცხადება აშშ-ს სახელმწიფო დეპარტამენტშიც დაადასტურეს.

“მივესალმები პრეზიდენტ დონალდ ტრამპის გადაწყვეტილებას, რომლის თანახმადაც აშშ-ს საელჩოს გადმოტანა იერუსალიმში, ისრაელის დამოუკიდებლობის 70 წლისთავს ემთხვევა. ამაზე ძვირფასი საჩუქრიარ არსებობს. ეს ისტორიულად სწორი და სამართლიანი ნაბიჯია. მადლობა მეგობარო“, - წერს კაცი Twitter-ის საკუთარ გვერდზე.

ცნობისთვის, მანამდე ამერიკის შეერთებული შტატების პრეზიდენტის ადმინისტრაციამ მოამზადა გეგმა, რომლის თანახმადაც, ქვეყნის საელჩოს თელ-ავივიდან იერუსალიმში გადატანა 2019 წლისთვის მოხდება. ამ ინფორმაციას The New York Times-ი ავრცელებდა. კიდევ უფრო ადრე კი, თეთრი სახლის ადმინისტრაციაში აცხადებდნენ, რომ საელჩოს იერუსალიმში გადატანა დონალდ ტრამპის ვადის ამოწურვამდე არ მოხდებოდა.

შეგახსენებთ, რომ 2017 წლის 6 დკემბერს ამერიკის პრეზიდენტმა იერუსალიმი ისრაელის დედაქალაქად აღიარა. აღნიშნულს მსოფლიოს მასშტაბით დიდი კრიტიკა მოჰყვა. აღმოსავლეთ იერუსალიმში პალესტინელებსა და ისრაელის სამართალდამცველებს შორის შეტაკებები დაიწყო, რის შედეგადაც 20-მდე ადამიანი დაიღუპა 1000-ზე მეტი ადამიანი კი, დაშავდა.

I would like to congratulate Donald Trump, the President of the US @POTUS on his decision to transfer the US Embassy to our capital on Israel's 70th Independence Day. There is no greater gift than that! The most just and correct move. Thanks friend!
— ישראל כץ Israel Katz (@Israel_katz) February 23, 2018