ისრაელის ავიაციამ სირიის თავდაცვით სისტემებსა და ირანულ სამიზნეებზე იერიში მიიტანა

2018-02-11 14:14:52, 2597 ნახვა

მსოფლიო

ისრაელის ავიაციამ სირიის თავდაცვით სისტემებსა და სირიაში არსებულ ირანულ სამიზნეებზე მასშტაბური იერიში მიიტანა. განადგურებულია 12 სამიზნე.

The guardian-ის ცნობით, ისრაელის ავიაციამ ქვეყნის ჩრდილოეთით საჰაერო სივრცის მნიშვნელოვან ნაწილზე ფრენები აკრძალა. ქვეყნის მთავარი აეროპორტი კი მუშაობას ჩვეულ რეჟიმში განაგრძობს.
რამდენიმე საათით ადრე, ისრაელის კუთვნილი ავიაგამანადგურებელი F-16 სირიის ჰაერსაწინააღმდეგო თავდაცვითი სისტემის საშუალებით ჩამოაგდეს.

სამხედრო თვითმფრინავში მყოფმა ორივე მფრინავმა კატაპულტირება მოასწრო, თუმცა ორივე მათგანს სხვადასხვა სიმძიმის მოტეხილობები აღენიშნება.

ავიაგამანადგურებელმა კატასტროფა ისრაელის ჩრდილოეთ ნაწილში განიცადა. გავრცელებული ცნობით, F-16 ჰაერში ირანული უპილოტო საფრენი აპარატის გასანადგურებლად აიჭრა, რომელმაც ისრაელის საჰაერო სივრცე სირიის ტერიტორიიდან დაარღვია.