თეა წულუკიანი საფრანგეთის შს მინისტრსა და ევროპულ საქმეთა გენერალურ მდივანს შეხვდება

2015-05-05 09:36:45, 433 ნახვა

პოლიტიკა

საქართველოს იუსტიციის მინისტრი თეა წულუკიანი დღეს პარიზში ოფიციალურ შეხვედრებს გამართავს.

იუსტიციის სამინისტროს ინფორმაციით, თეა წულუკიანი საფრანგეთის შს მინისტრ ბერნარ კაზნევს და საფრანგეთის ევროპულ საქმეთა გენერალურ მდივან ფილიპ ლეგლიზ-კოსტას შეხვდება.

შს მინისტრთან ერთად იუსტიციის მინისტრი საფრანგეთის შინაგან საქმეთა სამინისტროს მიგრაციის და დოკუმენტების უსაფრთხოების სამმართველოს უფროსებსაც შეხვდება.

„მინისტრის ვიზიტის მთავარი მიზანი რიგის სამიტამდე ევროპის სახელმწიფოთა პასუხისმგებელი პირებისათვის საქართველოს მიერ ვიზალიბერალიზაციის სამოქმედო გეგმის შესრულების ანგარიშის გაცნობაა. მინისტრი თავად მიაწვდის ევროპის ერთ-ერთი წამყვანი ქვეყნის შს მინისტრსა და ევროპულ საქმეთა გენერალურ მდივანს ინფორმაციას იმის შესახებ, თუ რა გააკეთა საქართველომ დოკუმენტების უსაფრთხოების კუთხით და რა რეფორმები გატარდა მიგრაციის მიმართულებით.

თეა წულუკიანი სხვა მინისტრებთან ერთად აქტიურ სამუშაოს ატარებს რიგის სამიტამდე, რათა 21-22 მაისს ევროკავშირის წევრმა ქვეყნებმა დადებითად შეაფასონ საქართველოს მიერ გაწეული ასოცირების ხელშეკრულებისა და ვიზალიბერალიზაციის დღის წესრიგით გათვალისწინებული საქმიანობა“, - აცხადებენ უწყებაში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან