„პატრიოტთა ალიანსის“ მოწვევით, საქართველოში რუსეთის დუმის დეპუტატების დელეგაცია ჩამოვა.

ამის შესახებ რუსეთის დუმის დსთ-ს საქმეთა კომიტეტის თავმჯდომარე ლეონიდ კალაშნიკოვმა განაცხადა.

როგორც მან აღნიშნა, საპარლამენტო დიპლომატია რუსეთსა და საქართველოს ურთიერთობების აღდგენაში, სავიზო პრობლემების გადაჭრაში და ეკონომიკური კავშირების გაძლიერებაში უნდა დაეხმაროს.

მისივე თქმით, ბოლო 10 წლის განმავლობაში რუსულ-ქართული დიალოგი მინიმუმამდე იყო დაყვანილი, თუმცა ორი ქვეყნის პარლამენტარების ძალისხმევით, ურთიერთობის აღდგენა დაიწყო.

„თბილისში აუცილებლად ჩავალთ. რუსი პარლამენტარები საქართველოში 10 წელია არ ყოფილან. ჩვენ მთელი რიგი საკითხები გვაქვს გადასაჭრელი, მათ შორის განვიხილავთ ეკონომიკურ, სავიზო საკითხებს და დიპლომატიურ ურთიერთობებს“, - განაცხადა პოლიტიკოსმა და დასძინა, რომ მოსკოვისა და თბილისის კონტაქტების უფრო მაღალ დონეზე აყვანა სურთ.

თავის მხრივ, პარლამენტში „პატრიოტთა ალიანსის“ თავმჯდომარე გიორგი ლომიამ, „იზვესტიას“ განუცხადა, რომ დიალოგის გარეშე, ორი ქვეყნის ურთიერთობების ჩიხიდან გამოყვანა შეუძლებელია.

„თუმცა ყველაფერი მხოლოდ დიალოგზე არ არის დამოკიდებული. არის ბევრი დამატებითი სირთულე და პრობლემები, მაგალითად ოკუპაციის შესახებ კანონი. ჩვენ მთავრობას ჩვენი პოზიცია სწორად არ ესმის, თუმცა დარწმუნებული ვარ, საზოგადოებას ესმის და ბოლო სიტყვას სწორედ საზოგადოება იტყვის“, - განაცხადა ლომიამ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

SJP-მ ფორმულას, ტვ პირველისა და პუბლიკას საქმეებზე განგაშის სიგნალი ჩართო

ცაგერის საკრებულოს დეპუტატი „ქურდული სამყაროს“ მხარდაჭერის ბრალდებით დააკავეს

მარეგულირებელი კომისიის მიერ ტვ პირველისთვის დაკისრებული სანქციის გამო, ევროსაბჭომ განგაში გამოაცხადა

ე.წ. ქურდული გარჩევების საქმეზე დაკავებული ლალო გველესიანი და სხვა პირები პატიმრობაში გაუშვეს