2017-06-29 13:08:33, 2112 ნახვა
საზოგადოება
პარლამენტი დეპუტატების ელექტრონულ ფოსტებზე კიბერთავდასხმას არ ადასტურებს
დეპუტატების ელექტრონულ ფოსტებზე კიბერთავდასხმის შესახებ გავრცელებულ ინფორმაციას პარლამენტში არ ადასტურებენ.
როგორც "ექსპრესნიუსს" პარლამენტის პრეს-სამსახურში განუცხადეს, საკანონმდებლო ორგანოს ჰქონდა ინფორმაცია ვირუსის არსებობის შესახებ, რის გამოც პრევენციული ღონისძიებები განხორციელდა.
"არ ვიცით საიდან წამოვიდა ინფორმაცია, რომ პარლამენტზე კიბერთავდასხმა მოხდა. არანაირი კიბერთავდასხმა არ ყოფილა. ჩვენ გვქონდა ინფორმაცია ვირუსის შესახებ და გარკვეული პრევენციული ზომები განხორციელდა. პრევენციული ღონისძიებების ფარგლებში მივიღეთ ინსტრუქცია, თუ როგორი მეილები არ უნდა გაგვეხსნა, საუბარი იყო შემომავალ მეილებზე", - განაცხადეს პარლამენტში.
ცნობისთვის, მანამდე გავრცელდა ინფორმაცია, რომ დეპუტატების ელექტრონულ ფოსტებზე კიბერთავდასხმა განხორციელდა.
ავტორი: ირაკლი მანაგაძე , ექსპრესნიუსის რეპორტიორი 2009 წლიდან
epn.ge (@expressnews.ge)
