ხუხაშვილი: „ენმ“ დაზიანებული ბრენდია - ზაალ უდუმაშვილს, როგორც დამოუკიდებელ კანდიდატს, გამარჯვების მეტი შანსი ექნებოდა

2017-06-26 14:06:01, 2701 ნახვა

პოლიტიკა კომენტარი

ექსპერტის პოლიტიკურ საკითხებში, გია ხუხაშვილის შეფასებით, თბილისის მერობის კანდიდატად ზაალ უდუმაშვილის წარდგენით, „ნაციონალურმა მოძრაობამ“ სწორი გადაწყვეტილება მიიღო.

თუმცა, როგორც ხუხაშვილმა "ექსპრესნიუსთან" საუბარში განმარტა, ზაალ უდუმაშვილს, დამოუკიდებელ კანდიდატად წარდგენის შემთხვევაში, გამარჯვების მეტი შანსი ექნებოდა.

"მოხდა ტანდემის ფორმირება ანუ "ნაციონალურმა მოძრაობამ" წარადგინა თბილისის მერობისა და საკრებულოს თავმჯდომარის კანდიდატები. შეიძლება ითქვას, რომ პოლიტიკური ცოდვებით დაუმძიმებელი კანდიდატი იქნა შერჩეული - ეს პოლიტექნოლოგიურად სწორი ნაბიჯია. ამასთან, ვიზუალურადაც და ცნობადობითაც სწორი არჩევანია გაკეთებული, ანუ შეიძლება ითქვას, რომ "ნაციონალურმა მოძრაობამ" სწორად იმუშავა. მაგრამ ჩვენ რომ ორი ვარიანტი ავიღოთ, ანუ ზაალ უდუმაშვილი, როგორც დამოუკიდებელი კანდიდატი და ზაალ უდუმაშვილი, როგორც "ნაციონალური მოძრაობის" კანდიდატი, პირველი მოიგებდა. მას როგორც პიროვნებას ექნებოდა უფრო მეტი შანსი, ვიდრე "ნაციონალური მოძრაობის" კანდიდატად. რატომ? იმიტომ, რომ "ნაციონალური მოძრაობა" არის დაზიანებული ბრენდი და ზაალ უდუმაშვილისთვის შესაბამისად ეს უფრო ტვირთია ელექტორალური გაგებით, ვიდრე უპირატესობის ან სტიმულის მიმცემი. ერთადერთი რასაც აძლევს "ნაციონალური მოძრაობა" ზაალ უდუმაშვილს, ეს არის ორგანიზაციული რესურსი, რაც მათ აქვთ. მაგრამ აქვთ ისეთი გადაულახავი ხარვეზიც, რაც ძალიან ბუნდოვანს ხდის ამ კამპანიის წარმატებულობას", - აღნიშნა ხუხაშვილმა.

მისივე თქმით, წინასაარჩევნო კამპანია მკვეთრად გამოხატული, ნეგატიური და კომპრომატებზე აგებული იქნება.

"მეორეს მხრივ, თუ ჩვენ მოწინააღმდეგედ განვიხილავთ სახელისუფლებო კანდიდატს, საქმე იმაშია, რომ ეს კანდიდატიც უკვე საკმაო ცოდვებით დამძიმებული შემოდის ამ პოლიტიკურ ბაზარზე. კამპანია იქნება მკვეთრად გამოხატული, ნეგატიური, ანუ კომპრომატებზე აგებული და სამწუხაროდ "ნაციონალურ მოძრაობას" ასეთი ტიპის კომპრომატები "ქართული ოცნების" კანდიდატზე ალბათ ბევრი ექნება გამზადებული. მიუხედავად იმისა, მოიგებს თუ არა მმართველი გუნდის კანდიდატი, მისი სავარაუდო გამარჯვება გუნდს მაღალი პოლიტიკური ფასი დაუჯდება, რაც პოლიტიკურ კარიერას ფაქტობრივად ბოლოს მოუღებს", - განაცხადა გია ხუხაშვილმა.

რაც შეეხება ნიკა მელიას თბილისის საკრებულოს თავმჯდომარის პოსტზე კენჭისყრას, ექსპერტმა აღნიშნა, რომ "ნიკანორ მელიას აქვს ზუსტად ისეთივე შანსი, რაც ზაალ უდუმაშვილს, მაგრამ ცოტა უფრო ნაკლები".

შეგახსენებთ, დღეს "ნაციონალურმა მოძრაობამ“ თბილისის მერობის კანდიდატად ზაალ უდუმაშვილი ოფიციალურად წარადგინა. გარდა ამისა, დღეს გამართულ პრესკონფერენციაზე პარტიის თავმჯდომარემ ნიკა მელიამ განაცხადა, რომ პარლამენტს ტოვებს და თბილისის საკრებულოს თავმჯდომარის პოსტზე იყრის კენჭს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან