ბალტიის ასამბლეამ ცხინვალის რეგიონში „რეფერენდუმის“ გამართვის გადაწყვეტილების თაობაზე განცხადება გაავრცელა

2017-03-28 10:10:00, 2038 ნახვა

პოლიტიკა საზოგადოება

ბალტიის ასამბლეის ვებ-გვერდზე გამოქვეყნდა ბალტიის ასამბლეის პრეზიდიუმის განცხადება ცხინვალის რეგიონში ე.წ. რეფერენდუმის ჩატარების შესახებ მიღებული გადაწყვეტილების თაობაზე.

როგორც "ექსპრესნიუსს" საქართველოს საგარეო საქმეთა სამინისტროდან აცნობეს, განცხადებაში ასამბლეა კიდევ ერთხელ ადასტურებს საერთაშორისოდ აღიარებულ ფარგლებში საქართველოს სუვერენიტეტისა და ტერიტორიული მთლიანობის მხარდაჭერას და ხაზს უსვამს ყველა კონფლიქტის მშვიდობიანი გზით მოგვარების მნიშვნელობას.

„ბალტიის ასამბლეა სრულად უჭერს მხარს ევროკავშირის 2017 წლის 16 თებერვლის განცხადებას, ცხინვალის რეგიონში ე.წ. რეფერენდუმის გამართვის გადაწყვეტილების თაობაზე და ევროკავშირის 2017 წლის 9 მარტის განცხადებას „საქართველოში აფხაზეთის რეგიონში ე.წ. გადასასვლელი პუნქტების დახურვის“ შესახებ“, - აღნიშნულია განცხადებაში.

საკუთარ განცხადებაში ბალტიის ასამბლეა ასევე ხაზს უსვამს, რომ რუსეთის ფედერაციასა და საქართველოს აფხაზეთისა და ცხინვალის რეგიონებს შორის ხელმოწერილი ყველა შეთანხმება არალეგიტიმურია, არღვევს საერთაშორისო სამართლის ნორმებს და შეუსაბამობაში მოდის რუსეთის ფედერაციის მიერ აღებულ საერთაშორისო ვალდებულებებთან.

ბალტიის ასამბლეა კიდევ ერთხელ მოუწოდებს რუსეთის ფედერაციას შეასრულოს 2008 წლის 12 აგვისტოს ცეცხლის შეწყვეტის შესახებ აღებული ვალდებულებები.