დავით უსუფაშვილი: ე.წ. ხელშეკრულების ხელმოწერა, მოსკოვის მხრიდან საქართველოს წინააღმდეგ აგრესიული ნაბიჯია

2015-03-18 14:18:31, 455 ნახვა

პოლიტიკა

რუსეთის ფედერაციასა და ოკუპირებულ სამხრეთ ოსეთს შორის „მოკავშირეობისა და ინტეგრაციის შესახებ" ე.წ. ხელშეკრულების დღეს დაგეგმილ ხელმოწერას, პარლამენტის თავმჯდომარე დავით უსუფაშვილი რუსეთის მხრიდან საქართველოს წინააღმდეგ გადადგმულ აგრესიულ ნაბიჯად აფასებს.
უსუფაშვილის თქმით, ამ ხელშეკრულებას სამართლებრივად არავითარი ძალა არ ექნება და მას მსოფლიო თანამეგობრობა არ აღიარებს.
"ეს არის არარა ხელშეკრულება, ბათილი ხელშეკრულება. იურიდიული ძალის არმქონე ხელშეკრულება. ამ თვალსაზრისით ყველაფერი ნათელია.ამაზე შეთანხმებულია ციცილიზებული მსფოლიო.ამასობაში ეს არის აგრესიული ნაბიჯი მოსკოვის მხრიდან საქართველოს წინააღმდეგ. ამაზეც არაერთხელ განვაცხადეთ",-განაცხადა დავით უსუფაშვილმა.
ცნობისთვის, რუსეთის ფედერაციასა და ოკუპირებულ სამხრეთ ოსეთს შორის „მოკავშირეობისა და ინტეგრაციის შესახებ" ე.წ. ხელშეკრულებას მხარეები დღეს მოსკოვში გააფორმებენ. ამის შესახებ განცხადება კრემლის ოფიციალურ გვერდზეა გამოქვეყნებული. მოკავშირეობისა და ინტეგრაციის შესახებ ხელშეკრულებას ხელს რუსეთის ფედერაციის პრეზიდენტი ვლადიმერ პუტინი და ოკუპირებული სამხრეთ ოსეთის პრეზიდენტი ლეონიდ თიბილოვი მოაწერენ. შეგახსენებთ, ე.წ. ხელშეკრულების გაფორმება 11 მარტს იგეგმებოდა, თუმცა გარკვეული მიზეზების გამო გადაიდო. აღნიშნულ ფაქტს რუსული მედია ვლადიმერ პუტინის ჯამრთელობასთან დაკავშირებულ პრობლემებს უკავშირებს, რადგან პუტინი 1 კვირაზე მეტი ხნის განმავლობაში საზოგადობის წინაშე არ გამოჩენილა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან