მრგვალი მაგიდა საქართველოს მთავრობასა და სამოქალაქო საზოგადოების წარმომადგენლებს შორის

2016-04-28 18:54:12, 390 ნახვა

პოლიტიკა

28 აპრილს, საქართველოს მთავრობის ადმინისტრაციაში, საქართველოს მთავრობასა და „აღმოსავლეთ პარტნიორობის" სამოქალაქო საზოგადოების ფორუმის საქართველოს ეროვნულ პლატფორმას შორის თანამშრომლობის შესახებ გაფორმებული მემორანდუმის ფარგლებში ასოცირების შესახებ შეთანხმების სოფლის მეურნეობისა და სასოფლო განვითარებასთან დაკავშირებულ საკითხებზე პირველი შეხვედრა გაიმართა.
შეხვედრაში ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის პირველი მოადგილე არჩილ ყარაულაშვილი, საქართველოს სოფლის მეურნეობის მინისტრის პირველი მოადგილე ნოდარ კერესელიძე და „აღმოსავლეთ პარტნიორობის" სამოქალაქო საზოგადოების ფორუმის საქართველოს ეროვნულ პლატფორმის მეორე სამუშაო ჯგუფის წარმომადგენლები მონაწილეობდნენ.

აღნიშნული მემორანდუმი ითვალისწინებს შეხვედრების გამართვას მინიმუმ 6 თვეში ერთხელ, ასოცირების შესახებ შეთანხმების სექტორული თანამშრომლობის ცალკეულ საკითხებზე.
შეხვედრის მიზანია ასოცირების შესახებ შეთანხმების განხორციელებისა და მონიტორინგის პროცესში სამოქალაქო საზოგადოების ჩართვა. შეხვედრაზე განიხილეს ასოცირების შესახებ შეთანხმების განხორციელება, კერძოდ, სოფლის მეურნეობასთან და სასოფლო განვითარებასთან დაკავშირებული ქმედებების საკითხებზე განხორციელებული და დაგეგმილი რეფორმები.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან