პანკისის ხეობის მოსახლეობასთან პაციენტის უფლებების შესახებ შეხვედრა გაიმართა

2016-04-21 22:33:20, 574 ნახვა

საზოგადოება

"პაციენტის უფლებების კვირეულის" ფარგლებში, პანკისის ხეობის მოსახლეობასთან შეხვედრა გაიმართა. ადგილობრივ მოსახლეობას მიეწოდა ინფორმაცია რა უნდა იცოდეს მოქალაქემ პაციენტის უფლებების შესახებ; რა შეიძლება გამოიწვიოს პაციენტის უფლებების არცოდნამ; როგორ უნდა მოიქცეს საქართველოს მოქალაქე, თუკი მისი, როგორც პაციენტის უფლებები ირღვევა; რა მექანიზმები არსებობს უფლებების შესაძლო დარღვევაზე რეაგირებისთვის და ა.შ.

"პაციენტის უფლებების ცხელი ხაზის" წარმომადგენლებმა ასევე ისაუბრეს საყოველთაო ჯანდაცვის პროგრამის დეტალებზე; რა ტიპის შეღავათების მიღება შეუძლია მოქალაქეთა ამათუიმ ჯგუფს; როგორ ხდება სხვადასხვა სახელმწიფო სამედიცინო პროგრამებში ჩართვა და ოპერაციების დაფინანსება.

ადგილობრივი მოსახლეობის განსაკუთრებული ინტერესი საყოველთაო ჯანდაცვის პროგრამის შესახებ დისკუსიამ გამოიწვია. მათი თქმით, ადგილობრივების დიდმა ნაწილმა არ იცის როგორ უნდა ისარგებლონ სახელმწიფოს შეღავათებით. ასევე აღინიშნა მოქალაქის სამედიცინო და სოციალური უფლებების დარღვევის რამდენიმე შემთხვევა, რომლებზეც "პაციენტის უფლებების ცხელი ხაზი" რეაგირებას მოახდენს.

ამასთან, ადგილობრივების თხოვნით, ცხელი ხაზის წარმომადგენლებმა სოფელ დუისის მოსახლეობას ინდივიდუალური კონსულტაციებიც გაუწიეს და ინფორმაცია მიაწოდეს, როგორ უნდა იმოქმედონ უახლოეს მომავალში დაგეგმილი სამედიცინო სერვისების სრულფასოვნად მისაღებად.

შეხვედრის დასასრულს, მონაწილეებს საინფორმაციო ბუკლეტები, პლაკატები და პაციენტის უფლებების ცხელი ხაზის სამახსოვრო საკანცელარიო ნივთები დაურიგდათ. "პაციენტის უფლებების კვირეული" მარტში სამეგრელოს რეგიონიდან დაიწყო. მომდევნო თვეებში მსგავსი შეხვედრები საქართველოს სხვადასხვა ქალაქში გაგრძელდება.

პაციენტის უფლებების დაცვის პროექტის ფინანსურ მხარდაჭერას ფონდი "ღია საზოგადოება - საქართველო" უზრუნველყოფს.