„ნაციონალური მოძრაობის“ წევრის აკაკი მინაშვილის განცხადებით,  „ქართული ოცნება“ ცდილობს, გიორგი კვირიკაშვილი ყველა თანამდებობას მოარგოს, რათა საარჩევნო სარგებელი მიიღოს.

ამის შესახებ მინაშვილმა იურიდიულ საკითხთა კომიტეტზე განაცხადა, სადაც „საარჩევნო კოდექსში“ ცვლილებებს განიხილავდნენ.

„თქვენ გეშინიათ პრემიერმინისტრის გადადგომის, არა მთავრობის არასტაბილურობის გამო, არამედ იმის გამო, რომ „ქართულ ოცნებას“ არ ექნება საკმარისი ხმა, რომ ახალი პრემიერი დანიშნოს. გიორგი კვირიკაშვილი არავითარი სარგებელის მომტანი არ არის, ისეთივე ნომინალური ფიგურაა, როგორიც იყო ირაკლი ღარიბაშვილი ბიძინა ივანიშვილის პირობებში.

2015 წლის დეკემბრის შემდეგ არავითარი წინსვლა არ გვაქვს, პირიქით, გრძელდება ეს უკუსვლა, მაგრამ რატომღაც ივანიშვილს ჰგონია, რომ ეს მომგებიანია, ფიქრობს, რომ სხვა კვალიფიციური ადამიანი არ გააჩნია და კვირიკაშვილი ერთ ადგილსაც იყოს და მეორე ადგილასაც. „ქართული ოცნება“ ხვდება, რომ ის არჩევნებს ვერ მოიგებს, თორემ საკუთარ გამარჯვებაში დარწმუნებული რომ იყოს, რა პრობლემა იქნებოდა, რომ პრემიერი კვირიკაშვილი საარჩევნო სიაში არ იყოს. საკუთარ გამარჯვებაში დარწმუნებული პოლიტიკური პარტია იტყოდა, რომ კვირიკაშვილი შემდგომი არჩევნების შემდეგ იქნება პრემიერმინისტრი“, - განაცხადა აკაკი მინაშვილმა.

ცნობისთვის, საქართველოს პრემიერმინისტრს, თუ ის პარლამენტის წევრობის კანდიდატად იქნება წარდგენილი, თანამდებობიდან გადადგომა აღარ მოეთხოვება.  აღნიშნულს  „საქართველოს საარჩევნო კოდექსში" ცვლილებების პროექტი ითვალისწინებს.

მოქმედი კანონის თანახმად, საქართველოს პარლამენტის წევრობის კანდიდატად რეგისტრაციის შესახებ შესაბამისი საარჩევნო კომისიისთვის განცხადების წარდგენიდან არაუგვიანეს მე-2 დღისა, დაკავებული თანამდებობიდან უნდა გადადგეს საქართველოს პრემიერმინისტრი. კანონპროექტის ავტორების განმარტებით,  აღნიშნული დემოკრატიული ქვეყნების ტრადიციას არ შეესაბამება.

„პრემიერმინისტრი, როგორც წესი, არჩევნებში გამარჯვებული პარტიის, საარჩევნო ბლოკის, ან მმართველი კოალიციის პოლიტიკური ლიდერია და ახალ საპარლამენტო არჩევნებში წარუძღვება შესაბამის საარჩევნო სუბიექტს. პრემიერმინისტრის მონაწილეობა საყოველთაოდ დაშვებული და გავრცელებული მოვლენაა. გარდა ამისა, საპარლამენტო არჩევნებში მონაწილეობისთვის პრემიერმინისტრის სავალდებულო გადადგომა გამოიწვევს მთავრობის გადადგომას და მთავრობის ახალი შემადგენლობის ფორმირების აუცილებლობას. ასეთი ვითარება კი, საპარლამენტო არჩევნებამდე რამდენიმე კვირით ადრე ახალი მთავრობის ფორმირება, რომელიც შესაძლოა, 2 თვის შემდეგ მთლიანად შეიცვალოს, არანაირად არ შეესაბამება კონსტიტუციური სისტემის სტაბილურობის სახელმწიფოებრივ ინტერესებს“, - ნათქვამია კანონპროექტის განმარტებით ბარათში.

კანონპროექტის ინიციატორები  დეპუტატები - ზვიად კვაჭანტირაძე და ვახტანგ ხმალაძე არიან.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სინდისის პატიმრების ოჯახის წევრები საზოგადოებას აქტიურობისკენ და მხარდაჭერისკენ მოუწოდებენ

დეკანოიძე - ოცნება თავად ასხივებს უწიგნურობას, ძალადობას და სიძილვილს, თუმცა სხვებს აპატიმრებს

ქართველი დიპლომატები და საზოგადოება რუსეთის მიერ საქართველოს ოკუპირებულ რეგიონების ანექსიური პროცესებისა და უსაფრთხოების რისკების გაძლიერებასთან დაკავშირებით საერთაშორისო პარტნიორებს მიმართავს

უკრაინამ ვოლგოგრადში მდებარე „ისკანდერის“ სარაკეტო ქარხანას „ფლამინგოს“ რაკეტები დაარტყა