2025-08-19 14:40:32, 1446 ნახვა
სამართალი
ოკუპირებულ არცევში საქართველოს მოქალაქე დააკავეს
ცხინვალის რეგიონში, ოკუპირებული სოფელ არცევის ე.წ. „შინაგან საქმეთა დეპარტამენტის“ თანამშრომლებმა საქართველოს მოქალაქე დააკავეს.
ცხინვალის დე ფაქტო შინაგან საქმეთა სამინისტრომ განაცხადა, რომ დაკავებულმა „უკანონოდ გადაკვეთა სამხრეთ ოსეთის სახელმწიფო საზღვარი“.
ინციდენტი 18 აგვისტოს საღამოს სოფელ არცევში მოხდა.
საქართველოს მოქალაქე 1992 წელს დაბადებული მამაკაცია.
„მისი ვინაობა დადგინდა, რის შემდეგაც დაკავებული სამხრეთ ოსეთის რესპუბლიკის კგბ-ს გადასცეს“, - წერენ ადგილობრივი მედია.
ამ ფაქტის დაწერის მომენტისთვის საქართველოს სახელმწიფო უსაფრთხოების სამსახურმა კომენტარი არ გააკეთა.
ავტორი: ექსპრესნიუსი,
epn.ge (@expressnews.ge)
