რუმინეთში საპრეზიდენტო არჩევნები, სულ მცირე, უცნაური იყო, - ამის შესახებ რუსეთის პრეზიდენტის პრესსპიკერმა, დიმიტრი პესკოვმა ჟურნალისტებს განუცხადა.

“ვიცით კანდიდატის ისტორია, რომელსაც საუკეთესო შანსები ჰქონდა, რომელიც, ყოველგვარი გამართლების ძებნის გარეშე, უბრალოდ ძალით მოხსნეს რბოლიდან. ასეთი ფავორიტი კანდიდატის არარსებობის შემთხვევაში, გაიმარჯვა მან, ვინც გაიმარჯვა. სინამდვილეში, ეს მოცემულობაა”, - აღნიშნა პესკოვმა.

ჟურნალისტებმა მას ასევე სთხოვეს, კომენტარი გაეკეთებინათ Telegram-ის მესენჯერის დამფუძნებლის, პაველ დუროვის განცხადებაზე, რომლის თქმითაც, საფრანგეთის საგარეო უსაფრთხოების მთავარი დირექტორატის დირექტორმა, ნიკოლას ლერნერმა მას რუმინელი მომხმარებლების „კონსერვატიული ხმების“ დაბლოკვა სთხოვა.

„ის ფაქტი, რომ ევროპული ქვეყნები - საფრანგეთი, დიდი ბრიტანეთი, გერმანია - ერევიან სხვა ქვეყნების შიდა საქმეებში, სიახლე არ არის. ეს სიახლე არ არის, ეს მხოლოდ ფრაგმენტებია, რომლებიც გამოაშკარავდება. დამიჯერეთ, ალბათ, ბევრად მეტი ასეთი ფრაგმენტია, ვიდრე თქვენ და მე ვიცით“, - აღნიშნა პესკოვმა.

შეგახსენებთ, გუშინ რუმინეთში საპრეზიდენტო არჩევნების მეორე ტური გაიმართა, ბუქარესტის ცენტრისტმა მერმა, ნიკუსორ დენმა მეტოქე, ულტრამემარჯვენე ჯორჯ სიმიონი დაამარცხა და არჩევნებში გამარჯვება მოიპოვა.

მანამდე, რუმინეთში საპრეზიდენტო არჩევნები გასული წლის ნოემბერში ჩატარდა, მაგრამ დეკემბერში რუმინეთის საკონსტიტუციო სასამართლომ არჩევნების პირველი ტურის შედეგების გაუქმების გადაწყვეტილება მიიღო, რის მიზეზადაც პირველ ადგილზე გასული ულტრამემარჯვენე კანდიდატის, კალინ ჯორჯესკუს სასარგებლოდ რუსეთის ჩარევა დაასახელა. თებერვლის ბოლოს, ჯორჯესკუს ბრალი წაუყენეს ექვს დანაშაულში, მათ შორის, ცრუ ინფორმაციის გავრცელებაში. აღსანიშნავია, რომ ჯორჯესკუმ რუმინეთის პრეზიდენტობის კანდიდატად რეგისტრაციისთვის განაცხადი შეიტანა, თუმცა ცენტრალურმა საარჩევნო კომისიამ მისი განაცხადი არ დააკმაყოფილა.

ავტორი: ექსპრესნიუსი,

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია