ორშაბათს, 10 თებერვალს, პალესტინურმა ჯგუფმა ჰამასმა – რომელსაც აშშ და ევროკავშირი ტერორისტულ ორგანიზაციად მიიჩნევენ – განაცხადა, რომ ამ ეტაპზე აჩერებს ისრაელელი ტყვეების გათავისუფლებას, რადგან ისრაელი არღვევს ცეცხლის შეწყვეტის შეთანხმებას.

ისრაელის თავდაცვის მინისტრმა, იოავ გალანტმა, ჰამასის ეს გადაწყვეტილება შეაფასა როგორც ღაზაში ცეცხლის შეწყვეტის შეთანხმების დარღვევა და ისრაელის არმიას ღაზაში მაქსიმალური მზაობის მდგომარეობაში ყოფნა უბრძანა.

ჰამასის გასამხედროებული დანაყოფის პრესმდივანმა, აბუ უბაიდამ, განაცხადა, რომ 19 იანვარს ცეცხლის შეწყვეტის შეთანხმების ამოქმედებიდან მოყოლებული, ისრაელი აფერხებს იძულებით გადაადგილებული პალესტინელების ჩრდილოეთ ღაზაში დაბრუნებას, კვლავ ახორციელებს ცეცხლს პალესტინელებზე და ხელს უშლის ჰუმანიტარული ტვირთის მიწოდებას.

ცეცხლის შეწყვეტის შეთანხმება ბოლო სამი კვირის განმავლობაში დიდწილად ძალაში რჩებოდა, თუმცა იყო ცნობები ისრაელის მხრიდან სროლის შემთხვევებზე, რომლებიც მსხვერპლს იწვევდნენ პალესტინელთა შორის.

ჰუმანიტარული სააგენტოების ინფორმაციით, შეთანხმების ამოქმედების შემდეგ გაიზარდა ღაზაში ჰუმანიტარული დახმარების მოცულობა.

უბაიდას განცხადებით, ჰამასი მძევლებს აღარ გაათავისუფლებს მანამ, სანამ ისრაელი არ დაიცავს შეთანხმებას და „ბოლო კვირების შედეგების გამო კომპენსაციას არ გაიღებს“.

მძევლების გათავისუფლების შემდეგი რაუნდი შაბათს იყო დანიშნული.

ცეცხლის შეწყვეტის და მძევლების გათავისუფლების შესახებ შეთანხმება 15 იანვარს გაფორმდა, რამდენიმე თვის განმავლობაში მიმდინარე მოლაპარაკებების შემდეგ. შეთანხმებას განიხილავენ როგორც პირველი ნაბიჯი ღაზაში 15 თვის განმავლობაში მიმდინარე ომის დასასრულებლად.

ომი დაიწყო მას შემდეგ, რაც 2023 წლის 7 ოქტომბერს ჰამასმა სამხრეთ ისრაელზე მიიტანა იერიში, მოკლა 1200-მდე ადამიანი და დაატყვევა 251 პირი.

ისრაელმა პასუხად პალესტინელთა ამ ანკლავში აწარმოა დამანგრეველი ომი, რომელშიც, ღაზის ჯანდაცვის მესვეურთა ცნობით, 46 000-ზე მეტი ადამიანი ემსხვერპლა.

ავტორი: ექსპრესნიუსი,

სოციალური ქსელები

კომერსანტი: კრემლში თქვეს, რომ ე.წ. სამხრეთ ოსეთის სტატუსის გადაწყვეტის დრო დადგა

გიორგი გახარია: ქართული ოცნება ოკუპანტ სახელმწიფოსთან კოლაბორაციონიზმის ღია დემონსტრირებას ახდენს

ედიტე ესტრელა: საქართველოში დემოკრატიული უკუსვლა გაგრძელდა, ასამბლეის არცერთი სასწრაფო რეკომენდაცია არ განხორციელებულა

მასწავლებლის ეროვნული ჯილდოს კონკურსზე 120-ზე მეტმა მასწავლებელმა შეავსო განაცხადი - პროექტის მთავარი მხარდამჭერია საქართველოს ბანკი