სააკაშვილი - შევარდნაძემ ივანიშვილს სახელმწიფო მინისტრობაც კი შესთავაზა - მან უარი თქვა - ეტყობა, ინსტრუქცია მიღებული არ იყო

2024-12-18 17:50:27, 483 ნახვა

პოლიტიკა

ბევრი მადანაშაულებს შეცდომით, რომ მე ჩამოვიყვანე ივანიშვილი - როდესაც პრეზიდენტი გავხდი, ივანიშვილი უკვე რამდენიმე წლის დაბრუნებული იყო სოლოლაკში,- ამის შესახებ საქართველოს მესამე პრეზიდენტი მიხეილ სააკაშვილი სოციალურ ქსელში წერს.

სააკაშვილის განცხადებით, პრეზიდენტმა, ედუარდ შევარდნაძემ ბიძინა ივანიშვილს „ერთი-ორჯერ სახელმწიფო მინისტრობაც კი შესთავაზა, თუმცა ივანიშვილმა მაშინ უარი თქვა - ეტყობა, ჯერ კურატორებისგან ინსტრუქცია არ იყო მიღებული“.

„დაიტოვეს“ ჯგუფში ბევრი მსაყვედურობს, რომ არ შევაჩერე რუსული ძალა 2012-ში.

მინდა, ამ ადამიანებს ვუპასუხო - მე ყველაფერი გავაკეთე იმისთვის, რომ ხალხისთვის ამეხსნა, თუ რა საფრთხის წინაშე ვიყავით, ამის იქით მაშინ უნდა გაგვეუქმებინა არჩევნები და მეც დიქტატურად გადავქცეულიყავი და ამ როლისთვის მე სრულიად გამოუსადეგარი ვიყავი.

ჩემი არჩევანი თავიდანვე იყო დემოკრატია და დემოკრატიას ახასიათებს ზიგზაგები.

კიდევ ერთი - ბევრი მადანაშაულებს შეცდომით, რომ მე ჩამოვიყვანე ივანიშვილი.

როდესაც პრეზიდენტი გავხდი, ივანიშვილი უკვე რამდენიმე წლის დაბრუნებული იყო სოლოლაკში და შევარდნაძემ მას ერთი-ორჯერ სახელმწიფო მინისტრობაც კი შესთავაზა, თუმცა ივანიშვილმა მაშინ უარი თქვა - ეტყობა, ჯერ კურატორებისგან ინსტრუქცია არ იყო მიღებული“,- წერს სააკაშვილი „ფეისბუქზე“.