დემოკრატიის კვლევის ინსტიტუტის ინფორმაციით, დე ფაქტო ცხინვალის იზოლაციურ პოლიტიკას ორი ადამიანის სიცოცხლე ემსხვერპლა.   

DRI -ის ცნობით, ახალგორის მაცხოვრებლებს ხარისხიან სამედიცინო მომსახურებაზე ხელი არ მიუწვდებათ, რაც არაერთი პაციენტის ჯანმრთელობის მდგომარეობის დამძიმების მიზეზი გახდა. 

როგორც DRI –ის მიერ გავრცელებულ განცხადებაში ვკითხულობთ საავადმყოფოს მთავარი ექიმის შეცვლის შემდეგ პაციენტების თბილისის კონტროლირებად ტერიტორიაზე გადმოყვანა უფრო გართულდა.

„გასული წლის დეკემბერში ახალგორის რაიონული საავადმყოფო ცხინვალის დე ფაქტო ადმინისტრაციის წარმომადგენლებმა შეამოწმეს. შემოწმების შედეგად, სავარაუდოდ,  კორუფციული სქემა გამოიკვეთა, რის გამოც საავადმყოფოს მთავარი ექიმი ჯემალ ბედოევი დაკავებული პოზიციიდან გაათავისუფლეს და დროებით მთავარ ექიმად მონიკა ჯიოევა დანიშნეს. ჯიოევა, რომელიც თანამდებობაზე ცხინვალიდან გადმოიყვანეს, მოსახლეობასა და სამედიცინო საზოგადოებაში დადებითად ხასიათდებოდა, თუმცა მისი დანიშვნის შემდეგ, პაციენტების თბილისის კონტროლირებად ტერიტორიაზე გადმოყვანა უფრო გართულდა. მთავარი ექიმის ბრძანებით, პაციენტები სამკურნალოდ მხოლოდ ცხინვალში გადაჰყავთ, მიუხედავად იმისა, რომ ახალგორი-ცხინვალის დამაკავშირებელი გზა, რთული რელიეფის გამო, პაციენტებისთვის განსაკუთრებით რთულია.“ - ნათქვამია განცხადებაში.

ამასთან დემოკრატიის კვლევის ინსტიტუტის მიერ გავრცელებული განცხადებიდან ირკვევა, რომ  პაციენტები სამკურნალოდ ცხინვალში გადაჰყავთ, რაც რთული რელიოეფის გამო პაციენტების მდგომარეობას ამძიმებს.

„ზემოაღნიშნული გარემოებების გამო, ახალგორში მაცხოვრებელ რამდენიმე პაციენტს მდგომარეობა კრიტიკულად დაუმძიმდა, რაც ორ შემთხვევაში ფატალური შედეგით დამთავრდა.  

იანვრის დასაწყისში, 70-წლამდე ასაკის მამაკაცი, ინფარქტის დიაგნოზით შეიყვანეს ახალგორის საავადმყოფოში. ნათესავების სურვილის მიუხედავად, - მამაკაცი თბილისის კონტროლირებად ტერიტორიაზე გაეშვათ, მონიკა ჯიოევას კატეგორიული უარის გამო, ცხინვალში გადაიყვანეს. მამაკაცი  გზაში გარდაიცვალა. 

იანვარში, ახალგორელი ქალი, მისი მოთხოვნის მიუხედავად, თბილისში არ გამოუშვეს და ცხინვალში გადაიყვანეს. ცხინვალში ჩატარებული ოპერაციის შემდეგ, პაციენტის მდგომარეობა დამძიმდა. ქალი თბილისის კონტროლირებად ტერიტორიაზე მხოლოდ მდგომარეობის გართულების შემდეგ გადმოიყვანეს. დღემდე კრიტიკულ მდგომარეობაში მყოფი პაციენტი მკურნალობას თბილისში აგრძელებს.

12 იანვარს, ახალგორელი მამაკაცი ცხინვალში მას შემდეგ გარდაიცვალა, რაც მძიმე მდგომარეობაში მყოფს, საავადმყოფოს მთავარმა ექიმმა თბილისში გადმოყვანის უფლება არ მისცა. 

დემოკრატიის კვლევის ინსტიტუტის შეფასებით, ახალგორის მაცხოვრებლებისთვის თავისუფლად გადაადგილების აკრძალვა, ადამიანის ფუნდამენტურ უფლებებს არღვევს, რაზეც პასუხისმგებლობა რუსეთის ფედერაციას და ცხინვალის დე ფაქტო რეჟიმს ეკისრებათ. თუმცა აღნიშნული არ ათავისუფლებს საქართველოს ხელისუფლებას მასზე დაკისრებული ვალდებულებისგან - იზრუნოს ოკუპირებულ ტერიტორიებზე მაცხოვრებელ საკუთარ მოქალაქეებზე. 

შესაბამისად, დემოკრატიის კვლევის ინსტიტუტი მოუწოდებს საქართველოს ხელისუფლებას, გამოიყენოს ყველა ფორმატი და შესაძლებლობა, ოკუპირებულ ტერიტორიებზე მცხოვრები ადამიანების უფლებების დასაცავად.“ - წერია დემოკრატიის კვლევის ინსტიტუტის მიერ გავრცელებულ ინფორმაციაში.

ავტორი: ექსპრესნიუსი,

სოციალური ქსელები

ენერგეტიკული კოლაფსი რუსეთში: უკრაინული დარტყმების ფონზე ,,გაზპრომმა” მუშაობა შეწყვიტა

ნაუსედა: ჩვენ გვაქვს სადაზვერვო ინფორმაცია, რომ რუსეთი ლიეტუვის ინფრასტრუქტურაზე თავდასხმებს გეგმავს

დღეს უკრაინის სახელმწიფოებრიობის დღეა - კიევი საერთაშორისო პარტნიორებს მასპინძლობს

ზურა ჯაფარიძეს ავტომობილი დაეჯახა - პოლიტიკოსი კლინიკაშია გადაყვანილი