განათლების ხარისხის განვითარების ეროვნული ცენტრი: საქართველოში აზერბაიჯანის უნივერსიტეტს ავტორიზაცია ხარვეზების გამო გაუუქმდა

2015-09-17 13:53:38, 1006 ნახვა

საზოგადოება

განათლების ხარისხის განვითარების ეროვნული ცენტრის ინფორმაციით, ჰეიდარ ალიევის სახელობის საქართველო აზერბაიჯანის სასწავლო უნივერსიტეტს ავტორიზაცია, დაწესებულებაში არსებული ხარვეზების გამო გაუუქმდა.

როგორც ხარისხის უზრუნველყოფის სამსახურის უფროსმა ლაშა მარგიშვილმა „ექსპრესნიუსს“ განუცხადა, საქართველოს აზერბაიჯანის უნივერსიტეტს ავტორიზაცია 2014 წლის 13 ივნისს მიენიჭა. რის შემდეგაც დაწესებულებაში განხორციელდა მონიტორინგი და უნივერსიტეტს მიეცა გარკვეული დრო, რომ იქ არსებული ხარვეზები გამოესწორებინა.
კერძოდ, მარგიშვილის ინფორმაციით, უნივერსიტეტს საგანმანათლებლო პროგრამებთან, მატერიალურ და ადამიანურ რესურსთან დაკავშრებით ჰქონდა პრობლემები.
„დაწესებულებას მიეცა საკმარისზე მეტი დრო, რომ მას მონიტორინგის ვიზიტამდე არსებული ხარვეზები გამოესწორებინა. ცენტრმა 2014 წლის 1 დეკემბრის ბრძანებით, 2–3 დეკემბერს დაწესებულებაში მონიტორინგის ვიზიტი განახორციელა. შედგა მონიტორინგის ჯგუფის დასკვნა, სადაც აღნიშნული იყო, რომ ის შენიშვნები, რომლებიც იმავე წლის 13 ივნისის საბჭოს სხდომაზე იყო დაფიქსირებული, კვლავ არსებობდა“, – აღნიშნა ლაშა მარგიშვილმა.
მისივე თქმით, 2014 წლის 19 დეკემბრის საგანმანათლებლო დაწესებულებების ავტორიზაციის საბჭოს მორიგ სხდომაზე, უნივერსიტეტს ხარვეზების გამოსასწორებლად 15 დღიანი ვადა მიეცა.
თუმცა, მარგიშვილის განცხადებით, დაწესებულებამ ხარვეზების გამოსწორება ვერ შეძლო და ამის საფუძველზე უნივერსიტეტს, 2015 წლის 23 თებერვალს ავტორიზაცია გაუუქმდა.
„იმის დამადასტურებლად გამოასწორა თუ არა დაწესებულებამ ეს შენიშვნები, 2015 წლის 29 იანვარს კვლავ განხორციელდა მონიტორინგის ჯგუფის ვიზიტი, რომელმაც დაადასტურა, რომ ხარვეზები ისევ არსებობდა. თავად დაწეებულების წარმომადგენელმა 23 თებერვლის საბჭოს სხდომაზე აღნიშნა, რომ ის მრავალჯერ ეცადა ხარვეზების აღმოფხვრას, თუმცა, მას ამის შესაბამისი ადამიანური რესურსი არ გააჩნდა. შესაბამისად, საბჭომ ავტორიზაციის გაუქმების შესახებ გადაწყვეტილება მიიღო“, – აცხადებს „ექსპრესნიუსთან“ საუბარში ლაშა მარგიშვილი.
როგორც მან აღნიშნა, ავტორიზაციის გაუქმების შემდეგ საქართველოში აზერბაიჯანულ უნივერსიტეტის ადმინისტრაციას განათლების ხარისხის განვითარების ეროვნული ცენტრისთვის აღარ მიუმართავს.
ცნობისთვის, ჰეიდარ ალიევის სახელობის საქართველო აზერბაიჯანის სასწავლო უნივერსიტეტის რექტორი ნოვრუზ ბაირამოვი აცხადებს, რომ მის უნივერსიტეტს ლიცენზია ირაკლი ალასანიასა და მაია ფანჯიკიძის ოპოზიციაში გადასვლის შემდეგ გაუუქმდა.
„ჩვენმა უნივერსიტეტმა განათლებისა და მეცნირების სამინისტროსა და ხარისხის შეფასების ეროვნულ ცენტრში რეგისტრაცია გაიარა. მაია ფანჯიკიძის ძმა ლაშა ფანჯიკიძე უნივერსიტეტის სტატუსის მიღებაში დაგვეხმარა, თუმცა მას შემდეგ, რაც მისი ნათესავები თანამდებობიდან გაათავისუფლებს, ეს სტატუსი წაგვართვეს“, - განაცხადა ბაირამოვმა.