ეკონომიკისა და მდგრადი განვითარების მინისტრის პირველმა მოადგილემ ეკატერინე მიქაბაძემ საქართველო - აზერბაიჯანის ბიზნეს ფორუმის მუშაობაში მიიღო მონაწილეობა.

ფორუმს, რომელიც ევროკავშირი - საქართველოს ბიზნეს საბჭოს ორგანიზებით გაიმართა, ასევე დაესწრნენ აზერბაიჯანის ელჩი საქართველოში დურსუნ ჰასანოვი, აზერბაიჯანის ინვესტიციების ხელშეწყობის სააგენტოს „აზპრომოს" დირექტორი ზოჰრან გადიროვი, კორპორაცია „ბიპის" საქართველოს ოფისის ხელმძღვანელი ენ დევისი, „სოკარ ენერჯი ჯორჯიას" გენერალური დირექტორი მაჰირ მამედოვი, ფაშა ბანკის დირექტორთა საბჭოს წევრი ასაფ ჰუსეინოვი და აზერბაიჯანული და საქართველოს ბიზნესის წარმომადგენლები. 

ფორუმი გახსნა ორგანიზატორი ევროკავშირი - საქართველოს ბიზნეს საბჭოს გენერალურმა მდივანმა ზვიად ჭუმბურიძემ. 

მისასალმებელ სიტყვაში, ეკონომიკისა და მდგრადი განვითარების მინისტრის პირველმა მოადგილემ დადებითად შეაფასა საქართველოსა და აზერბაიჯანის ეკონომიკური თანამშრომლობის განვითარების დინამიკა. მისი თქმით, საქართველოსა და აზერბაიჯანს შორის ურთიერთობები ორმხრივ და რეგიონულ ჭრილში დინამიურად ვითარდება სხვადასხვა მიმართულებით. ეკატერინე მიქაბაძემ ხაზი გაუსვა პროგრესს ისეთ მიმართულებებში, როგორიცაა ვაჭრობა, ინვესტიციები, რეგიონული თანამშრომლობა ისეთ ინფრასტრუქტურულ პროექტებში, როგორიცაა რკინიგზა, სამხრეთის გაზის კორიდორი, შუა სატრანსპორტო დერეფანი და სხვ.

მინისტრის პირველმა მოადგილემ ასევე მიმოიხილა საქართველოს ეკონომიკური ტენდენციები და აღნიშნა, რომ ბოლო წლების განმავლობაში ქვეყანაში გატარებულმა რეფორმებმა მნიშვნელოვნად შეუწყო ხელი ეკონომიკის ლიბერალიზაციას, კერძო სექტორის კონკურენტუნარიანობის ზრდას, ექსპორტის წახალისებას, ფინანსებზე ხელმისაწვდომობის ზრდასა  და მიმზიდველ საინვესტიციო და ბიზნეს გარემოს ჩამოყალიბებას. მთავრობის მიერ გადაიდგა ქმედითი ნაბიჯები ეკონომიკური პოლიტიკის ყველა მიმართულებით, რაც შესაბამისად აისახა ეკონომიკური მაჩვენებლებისა და საერთაშორისო რეიტინგების მნიშვნელოვან გაუმჯობესებაში.

ეკატერინე მიქაბაძემ ყურადღება გაამახვილა თანამშრომლობაზე ვაჭრობის, ტურიზმისა და ინვესტიციების კუთხით. კერძოდ, აზერბაიჯანი საქართველოს ერთ-ერთი მსხვილი სავაჭრო პარტნიორია. მისი თქმით, ძირითადი საექსპორტო ქვეყნების ათეულში, აზერბაიჯანი წინა წლის ანალოგიური პერიოდის მსგავსად პირველ ადგილზეა 13%-იანი წილით. დღეისათვის საქართველო-აზერბაიჯანს შორის მოქმედებს თავისუფალი ვაჭრობის რეჟიმი, რომელიც სამართლებრივად დარეგულირებულია, როგორც ორმხრივი, ასევე მრავალმხრივი ფორმატით. გარდა ამისა, ეკატერინე მიქაბაძემ ისაუბრა აზერბაიჯანის წვლილზე ტურიზმიდან მიღებულ შემოსავლებზე. კერძოდ, ტურიზმიდან მიღებული შემოსავლების 7% აზერბაიჯანელ ვიზიტორებზე მოდის.

დასასრულს, მინისტრის პირველმა მოადგილემ ბიზნეს ფორუმის მონაწილეებს ურთიერთსარგებლიანი თანამშრომლობა და სამომავლო წარმატებული პროექტების განხორციელება უსურვა.

ავტორი: NS (სტატია დაფინანსებულია),

სოციალური ქსელები

აშშ-ის მიერ ირანზე განხორციელებული თავდასხმების შედეგად რამდენიმე ადამიანი დაიჭრა

თურქეთში რამდენიმე საგზაო შემთხვევა მოხდა, რომელთა შედეგადაც დაღუპულები და დაშავებულები არიან

უკრაინის შეიარაღებულმა ძალებმა თათარსტანსა და სარატოვის ასევე ყუბანს და ვორონეჟის შეუტიეს

აშშ-მ ტანკერებზე თავდასხმის შემდეგ ირანული ნავთობით ვაჭრობის ლიცენზია გააუქმა.