გიორგი მარგველაშვილი: როცა მთავრობის შემადგენლობის წარდგენა გადავდე, არ მითქვამს, რომ რომელიმე კანდიდატი არ მომწონს

2015-05-06 14:38:59, 392 ნახვა

პოლიტიკა

საქართველოს პრეზიდენტმა გიორგი მარგველაშვილმა პირდაპირი პასუხი არ გასცა და დრო არ დაასახელა, თუ როდის გადააგზავნის მთავრობის შემადგენლობას პარლამენტში დასამტკიცებლად. თუმცა გიორგი მარგველაშვილმა აღნიშნა, რომ მთავრობის დროულ დამტკიცებას ხელს შეუწყობს.

როგორც გიორგი მარგველაშვილმა თემის კომენტირებისას ჟურნალისტებს განუცხადა, მის მიერ 1 კვირიანი კონსტიტუციური ვადის გამოყენება იყო ხელის შეწყობა პოლიტიკური ძალებისთვის, რომ გადაწყვეტილება მშვიდად მიეღოთ. გიორგი მარგველაშვილი, ამ კუთხით, პოზიტიურ შედეგებს ხედავს.

"მე შედეგს ვხედავ იმას, რომ ეს პროცესი შედგა.თუნდაც პოლიტსაბჭოს კრება ამის თაობაზე და თითოეული კანდიდატურის განხილვა ჩემთვის პოზიტიური შედეგი იყო. თუნდაც უმრავლესობის დეპუტატების კომენტარები იმაზე, რომ უფრო დეტალურად ჩაიხედეს საქმეში, ჩემთვის პოზიტიური შედეგის მომტანი იყო.მაგრამ კიდევ ერთი დეტალია გასათვალისწინებელი. ბუნებრივია, ეს ერთჯერადი პროცესი არ არის.ნებისმიერ სხვა მომენტში, როდესაც ჩვენ დავინახავთ, რომ არ იქნება პოლიტიკური მდგრადობა, მე ხელს შევუწყობ ყველა პოლიტიკურ ძალას, რომ მივიდეს მშვიდ გადაწყვეტილებამდე.მინისტრების კანდიდატურები ჩემი კომპეტენცია არ არის. ჩემი კომპეტენციაა პოლიტიკური პროცესი. მინისტრი, ვისაც აირჩევს უმრავლესობა, ის იქნება მინისტრი, მაგრამ მე უნდა დავინახო, რომ მართლა უმრავლესობამ აირჩია ეს მინისტრი",-განაცხადა გიორგი მარგველაშვილმა.

კითხვაზე დაინახეთ თუ არა, რომ მინისტრები მართლაც უმრავლესობამ აირჩია, გიორგი მარგველაშვილმა უპასუხა, რომ "დანახვის პროცესშია".

ამასთან, გიორგი მარგველაშვილის თქმით, როცა მთავრობის შემადგენლობის პარლამენტისთვის წარდგენა გადადო, არ უთქვამს, რომ რომელიმე მინისტრობის კანდიდატის წინააღმდეგი იყო.

"ან რომელიმე არ მომწონს, მაგრამ პრინციპული იყო, რომ ამ კანდიდატების შერჩევის პროცესი ყოფილიყო გახსნილი, დემოკრატიული გუნდის შიგნით მიმდინარე დისკუსიების შედეგად", -განაცხადა გიორგი მარგველაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან