2017-06-29 13:27:51, 1893 ნახვა

---

აფხაზეთის ა/რ მთავრობის ორგანიზებით, კონფერენცია ,,აფხაზეთი - არსებული მდგომარეობა, გამოწვევები და პერსპექტივები“ გაიმართება

30 ივნისს აფხაზეთის ავტონომიური რესპუბლიკის მთავრობისა და ნდობის აღდგენისა და შერიგების  საკითხებში აფხაზეთის ავტონომიური რესპუბლიკის  მინისტრის აპარატის მხარდაჭერითა და ორგანიზებით საქართველოს ტექნიკურ უნივერსიტეტში კონფერენცია ,,აფხაზეთი -  არსებული მდგომარეობა, გამოწვევები და პერსპექტივები“  გაიმართება.

კონფერენცია შედგება ორი თემატური სესიისგან: ნდობის აღდგენის და შერიგების საერთაშორისო მექანიზმები და ნდობის აღდგენისა და შერიგების შიდა სახელმწიფოებრივი მექანიზმები.

კონფერენციაზე განხილული იქნება აფხაზეთის დღევანდელი მდგომარეობა სოციალურ-ეკონომიკურ, პოლიტიკურ, კულტურულ სფეროში, რა პრობლემების წინაში დგას იგი დღეს, რა მექანიზმები მუშაობს და სამომავლოდ, რა ინსტრუმენტები შეიძლება იქნას შემუშავებული პრობლემების დასაძლევად როგორც ადგილობრივ, ასევე საერთაშორისო დონეზე.

შეხვედრაზე მოხსენებით წარსდგებიან  აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია,  საქართველოს საგარეო საქმეთა  მინისტრის პირველი მოადგილე დავით დონდუა, საქართველოს პარლამენტის თავმჯდომარის მოადგილე გიორგი ვოლსკი, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის პირველი მოადგილე პეტრე კანკავა, ევროკავშირის მისიის ხელმძღვანელი საქართველოში  იანოშ ჰერმანი,  ტერიტორიული მთლიანობის აღდგენის  საკითხთა დროებითი საპარლამენტო კომისიის თავმჯდომარის მოადგილე სალომე ზურაბიშვილი, ნდობის აღდგენისა და შერიგების საკითხებში აფხაზეთის ავტონომიური რესპუბლიკის მინისტრის პირველი მოადგილე ბელა კოპალიანი და სამეცნიერო წრის წარმომადგენლები.

პროექტის მიზანია დაშორიშორებულ საზოგადოებებს შორის სახალხო დიპლომატიის, სოციალურ-ეკონომიკურ და კულტურულ-საგანმანათლებლო სფეროებში თანამშრომლობის წახალისება.

კონფერენცია 2017 წლის 30 ივნისს, 11:00 საათზე,  საქართველოს ტექნიკური უნივერსიტეტის ადმინისტრაციული კორპუსის III  სართულზე,  საკონფერენციო დარბაზში გაიმართება.

 

(NS)

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი