კრემლის გუმბათით დაფარული თეთრი სახლი - ჟურნალ Time-ის ახალი ნომერი

2017-05-19 20:31:45, 2590 ნახვა

მსოფლიო სხვადასხვა

ამერიკულმა ჟურნალმა Time-მა ახალი ნომერი გამოუშვა, რომლის გარეკანზე თეთრი სახლი კრემლის გუმბათით, წითელ ფერებშია წარმოდგენილი.

ჟურნალის რედაქციისთვის ინსპირაციის წყაროდ ამერიკის შეერთებული შტატების პრეზიდენტის დონალდ ტრამპის გარშემო აგორებული სკანდალებია.

ბოლო პერიოდში მედიაში ინტენსიურად ვრცელდება ინფორმაცია, ტრამპსა და რუსეთს შორის არსებულ კავშირებზე.

მედიასა და საზოგადოებაში დიდი რეზონანსი ასევე, აშშ-ში რუსეთის საგარეო საქმეთა მინისტრის სერგეი ლავროვის ვიზიტმა და დონალდ ტრამპის მიერ შეხვედრის დროს ქვეყნისათვის მეტად მნიშვნელოვანი ინფორმაციის სავარაუდო გაჟღერებამ გამოიწვია.

გარდა ამისა, მორიგი სკანდალი FBI-ის დირექტორის ჯეიმს კომის თანამდებობიდან გათავისუფლებას ეხება. New York Times-ის ინფორმაციით, ჯეიმს კომი თანამდებობაზე ყოფნის დროს ტრამპსა და რუსეთს შორის არსებულ კავშირებს, ასევე კრემლის მიერ აშშ-ის 2016 წლის საპრეზიდენტო არჩევნებში სავარაუდო ჩარევას იძიებდა. აშშ-ში არსებობს ვერსია, რომ დონალდ ტრამპმა კომის გადაყენების გადაწყვეტილება სწორედ აღნიშნული გამოძიების გამო მიიღო.

დონალდ ტრამპი ყველა აღნიშნულ ბრალდებას უარყოფს, ხოლო FBI-ის დირექტორის გადაყენების მიზეზად მის მიერ "ბიუროს არაეფექტურად" მართვას ასახელებს.