პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის შეფასებით, სათამაშო ბიზნესი ახალგაზრდა თაობისთვის პრობლემას წარმოადგენს, თუმცა ის ქვეყანაში სერიოზული შემოსავლების შემოსვლას უწყობს ხელს.

ამის შესახებ სესიაშვილმა საქართველოს კათოლიკოს-პატრიარქის ილია მეორის სააღდგომო ეპისტოლესთან დაკავშირებით განაცხადა, სადაც პატრიარქი სათამაშო ბიზნესის პრობლემებზეც საუბრობს. 

„ეს საკმაოდ სერიოზული პრობლემაა ჩვენი ქვეყნისთვის, ახალგაზრდა თაობისთვის. თუმცა, არ უნდა დაგვავიწყდეს, რომ ამ ბიზნესით საკმაოდ სერიოზული შემოსავლები შემოდის ქვეყანაში. მათ შორის, განსაკუთრებით უცხო ქვეყნის მოქალაქეების მხრიდან, ამიტომ ამ თემაზე ასე მარტივად უარის თქმა, მე სწორად არ მიმაჩნია. ამაზე სპეციალისტებმა უნდა იმუშაონ“, - განაცხადა სესიაშვილმა.

მისივე თქმით, იმ რისკების შემცირება უნდა მოხდეს, რაც ახალგაზრდა თაობაში გარკვეული პრობლემების წარმოქმნას იწვევს.

„ამას უნდა ვებრძოლოთ და არა შედეგიდან გამომდინარე მარტივად გავაუქმოთ ყველაფერი. მიმაჩნია, რომ ასაკის ზღვარის შეზღუდვით უნდა შევამციროთ ეს რისკები“,- აღნიშნა სესიაშვილმა.

ცნობისთვის, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე სააღდგომო ეპისტოლეში სათამაშო ბიზნესის პრობლემებზე საუბრობს.

"შევეხები მეტად საშიშ და სერიოზულ პრობლემას, - სათამაშო ბიზნესს. ეს საქმიანობა, მართალია, ბიუჯეტისთვის, ალბათ, მომგებიანია, მაგრამ იგი იმდენად უარყოფითი მოვლენაა, რომ ბევრ ქვეყანაში საერთოდ აკრძალულია. ჩვენთან კი მას ბოლო დროს ინტერნეტ-სამორინეც (კაზინო) დაემატა.

თუ ჩვეულებრივ სამორინეში (კაზინოში) ასაკს ყურადღებას აქცევენ და გარკვეული თანხის ქონა აუცილებელია, ინტერნეტ-სივრცეში ეს შეზღუდვა არ არსებობს; ადამიანები, განსაკუთრებით ახალგაზრდები, რომელთაც ისედაც მცირე ფინანსები აქვთ, ცდუნებას ვერ უმკლავდებიან და დიდ ვალში და დიდ პრობლემებში ვარდებიან.

კატასტროფულად იზრდება მათი რიცხვი, რომელნიც მიჯაჭვულნი გახდნენ ამ საცდურზე; ბევრმა ქონება დაკარგა, მრავალი ოჯახი დაინგრა, ზოგმა თავიც მოიკლა. . . 

ვფიქრობთ, ხელისუფლებამ თავისი სიტყვა უნდა თქვას ამ მიმართულებით, და შესაძლებლობისამებრ, დაიცვას ქვეყნის აწმყო და მომავალი." - წერია პატრიარქის სააღდგომო ეპისტოლეში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

500 Global in Eurasia-ს მეათე ნაკადის დემო დღე 25 ივნისს გაიმართება

საქართველოს ბანკისა და Emolas Corporation - ის პარტნიორობის ფარგლებში, სამეფო უბნის თეატრი სპექტაკლ „მოახლეებს“ ნიუ იორკის სცენაზე წარადგენს

ალეკო ელისაშვილმა პაპუაშვილს სასამართლოში უჩივლა

Procter & Gamble-მა სანქცირებულ TV იმედთან თანამშრომლობა შეწყვიტა