თბილისის სახელმწიფო უნივერსიტეტის მაღლივ კორპუსთან გაზგასამართი სადგური აღარ აშენდება.

ამის შესახებ „ექსპრესნიუსისთვის“ გახდა ცნობილი.

ინვესტორმა კომპანია „გაზვილმა“ გეგმები  უნივერსიტეტის რექტორისა და სტუდენტების პროტესტის გამო შეცვალა. გაზგასამართი სადგურის ნაცვლად კომპანია უნივერსიტეტის მიმდებარე ტერიტორიაზე მრავალფუნქციური კომპლექსის აშენებას გეგმავს. ახალ პროექტში „გაზვილს“ ხუთჯერ მეტი ინვესტიციის ჩადება მოუწევს.

„ექსპრესნიუსთან“ საუბარში კომპანიის დამფუძნებელმა ვახტანგ ჩახნაშვილმა განაცხადა, რომ ახალ პროექტზე ეკონომიკის სამინისტროსა და მერიასთან ზეპირი მოლაპარაკება უკვე შედგა.

„ძალიან დიდი ზარალი მოგვადგა. გაზგასამართი სადგურისთვის მიწის შესყიდვასა და შესაბამის დანადგარებში დაახლოებით, 2,5 მილიონი ლარი გადავიხადეთ და იმის მაგივრად, რომ შემოსავალი მიგვეღო, ერთ წელზე მეტია გაჩერებულები ვართ და ბანკის კრედიტების გასტუმრება გვიწევს. თუმცა უნივერსიტეტის და სტუდენტების ინტერესების გამო, გადავწყვიტეთ, შევცვალოთ პროფილი, იმის მიუხედავად, რომ მიწაც კანონიერად ვიყიდეთ და ყველა ნებართვა წესრიგში გვაქვს. შესაბამისი უწყებებიდან და უნივერსიტეტიდანაც მაქვს დასტური, რომ ახალი პროექტი შესაბამისობაშია მოცემულ ადგილთან,“ - განაცხადა ვახტანგ ჩახნაშვილმა

ინვესტორის ინფორმაციით, მრავალფუნქციურ საცხოვრებელ კომპლექსში სხვადასხვა ობიექტები, მათ შორის ბინები, კაფე და საოფისე ფართები განთავსდება. საინვესტიციო თანხა კი 1,5 მილიონი ლარიდან დაახლოებით, 4 მილიონ დოლარამდე გაიზარდა. თანხების მოზიდვაზე ბანკებთან მოლაპარაკებები უკვე დაწყებულია. ამის მიუხედავად, „გაზვილის“ ხელმძღვანელობა არ გამორიცხავს, რომ გაზგასამართი სადგური სხვა ადგილას მაინც ააშენონ.

„გაზგასამართი სადგურების მიმართულებით ჩვენ სხვა ობიექტებიც გვაქვს. უკვე ნაყიდი დანადგარებით შეიძლება ისინი გავაძლიეროთ, ან სხვა მიწაზე გადავიტანოთ. შესაძლოა, ახალი მიწაც შევიძინოთ და იქ განვახორციელოთ გაზგასამართი ობიექტის ინვესტიცია,“ - განმარტა კომპანიის დამფუძნებელმა.

„გაზვილს“ საცხოვრებელი კომპლექსის მშენებლობასთან დაკავშირებით მერიაში განცხადი უკვე შეტანილი აქვს. კომპანია ნებართვის გაცემის შემდეგ ინვესტიციის განხორციელებას დაიწყებს.

შეგახსენებთ, თსუ-ს მაღლივი კორპუსის მიმდებარედ გაზგასამართი სადგურის მშენებლობას უნივერსიტეტის რექტორი და სტუდენტები ეწინაღმდეგებოდნენ. ისინი აცხადებდნენ, რომ სასწავლო დაწესებულების გვერდით ასეთი ობიექტის მშენებლობა უსაფრთხოების ნორმებიდან გამომდინარე არასწორი იყო.

მზია საგანელიძის ფოტო - რადიო  "თავისუფლება"

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კობახიძე ევროსაბჭოს რეზოლუციაზე - აბსურდია ყველაფერი, რაზეც საუბარია რეზოლუციაში, საქართველო არის მოწინავე დემოკრატიის თვალსაზრისით

500 Global in Eurasia-ს მეათე ნაკადის დემო დღე 25 ივნისს გაიმართება

საქართველოს ბანკისა და Emolas Corporation - ის პარტნიორობის ფარგლებში, სამეფო უბნის თეატრი სპექტაკლ „მოახლეებს“ ნიუ იორკის სცენაზე წარადგენს

ალეკო ელისაშვილმა პაპუაშვილს სასამართლოში უჩივლა