შავგულიძე: მესამე რაუნდის ფორმატში პრეზიდენტის საკითხი არ განგვიხილავს და არ ვიცი, სად გადაწყდა

2017-04-12 15:59:08, 1828 ნახვა

პოლიტიკა კომენტარი

საკონსტიტუციო კომისიის წევრის შალვა შავგულიძის განცხადებით, მესამე რაუნდის ფორმატში პრეზიდენტის საკითხი არ განუხილავთ.

შავგულიძის განმარტებით, არ იცის, რას ეფუძნება პარლამენტის თავმჯდომარის განცხადება, რომ ეს საკითხი გადაწყვეტილია.

მისივე შეფასებით, პრეზიდენტის არჩევითობის საკითხი აბსოლუტურად ბმაშია საარჩევნო სისტემასთან და განყენებულად განხილვა გამართლებული არ იქნება.

"პირობითად მესამე რაუნდის ფორმატში საკონსტიტუციო კომისიამ მუშაობა დავიწყეთ ახლა, 2 დღის წინ. მაგრამ ჯერჯერობით პრეზიდენტის თავამდე არ მივსულვართ. თუ ბატონი თავმჯდომარე იმას გულისხმობს, რომ ზოგადად ამ საკითხებზე ზეპირად ვსაუბრობდით, მაშინ ვერ მოისმინა, არ ვიცი. ვიმეორებ მესამე რაუნდის ფორმატში პრეზიდენტის საკითხი არ განგვიხილავს. ეს საკითხი ბმაშია რა თქმა უნდა საარჩევნო სისტემასთან და ქართულმა ოცნებამ, ვიცით საჯაროდ განაცხადა იმასთან დაკავშირებით, რომ ის იზიარებს რომ საპარლამენტო რესპუბლიკაში პრეზიდენტი პარლამენტის მიერ უნდა იყოს არჩეული, ან რაღაც არაპირდაპირი არჩევის წესით. მაგრამ, ეს განხორციელდება მხოლოდ მას შემდეგ, რაც არსებული საარჩევნო სისტემა შეიცვლება, სამართლიანი საარჩევნო სისტემით და ასეთი ახალი საარჩევნო სისტემით არჩეულ პარლამენტს მიეცეს პრეზიდენტის არჩევის შესაძლებლობა. ამიტომ, პრეზიდენტის არჩევითობის საკითხი აბსოლუტურად ბმაშია საარჩევნო სისტემასთან და განყენებულად განხილვა არ იქნება გამართლებული, თუ დღეს იყო ასეთი განცხადება პარლამენტის თავმჯდომარის მხრიდან, რომ ეს საკითხი გადაწყვეტილია უბრალოდ არ ვიცი, რას ეფუძნება, სად გადაწყდა",-აღნიშნა შავგულიძემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან