თავდაცვის მინისტრი ლევან იზორია ნატო-ს სამხედრო კომიტეტის თავმჯდომარეს, გენერალ პეტრ პაველს შეხვდა, რის შემდეგაც მედიისთვის ერთობლივი განცხადებები გაკეთდა.

ლევან იზორიას თქმით, ნატო-ს სამხედრო კომიტეტის ვიზიტი ნათელი დადასტურებაა იმისა, რომ ნატო მხარს უჭერს საქართველოს მისწრაფებას, გახდეს ალიანსის წევრი ქვეყანა და ასევე მხარს უჭერს ქვეყნის სუვერენიტეტსა და ტერიტორიულ მთლიანობას.

„ვიზიტი გვაძლევს შესაძლებლობას, შევათანხმოთ ჩვენი პრაქტიკული თანამშრომლობით მიღწეული შედეგები. ხაზგასმით მინდა აღვნიშნო ნატოსა და საქართველოს წვრთნისა და შეფასების ერთობლივი ცენტრი. სულ რაღაც მოკლე პერიოდში, ამ ცენტრმა თავისი აქტიურობით, განხორციელებული წვრთნების მასშტაბებით, დიდ წარმატებას მიაღწია. ნატო-ს სამხედრო კომიტეტს, ალიანსის წევრ თითოეულ ქვეყანას მინდა მადლობა გადავუხადო მხარდაჭერისთვის. ისინი აქტიურად არიან ჩართული იმ რეფორმების პროცესში, რომელსაც თავდაცვის სამინისტრო ახორციელებს. გავაღრმავებთ თანამშრომლობას ნატო-ს სამხედრო კომიტეტთან, რათა ქვეყანა იყოს უფრო თავდაცვისუნარიანი. ჩვენი რეფორმების მიზანია, გავხდეთ ნატო-სთან თავსებადი. თუ აკვირდებით ნატო-საქართველოს ურთიერთობის დინამიკას, ბოლო 6 თვის განმავლობაში, უპრეცედენტოა.სულ რაღაც 6 თვის წინ ვმასპინძლობდით ჩრდილოატლანტიკურ საბჭოს, უმაღლეს პოლიტიკურ ორგანოს, 2016 წლის ნოემბერში  გვქონდა ნატო-საქართველოს ერთობლივი წვრთნები, სულ ახლახანს დაახლოებით ორი კვირის წინ ძალიან წარმატებული ვიზიტი გვქონდა ბრიუსელში, ნატო-საქართველოს კომისიის ფარგლებში, დღეს კი დღეს კი ვმასპინძლობთ ნატო-ს სამხედრო კომიტეტს, მომავალში, აპრილის  დასაწყისში გვექნება ნატო-ს კვირეული, მაისის დასაწყისში კი ნატო-ს საპარლამენტო ასამბლეის საგაზაფხულო სესია გაიმართება“, - განაცხადა ლევან იზორიამ.

ცნობისთვის, ნატო-ს სამხედრო კომიტეტი საქართველოს ორდღიანი ოფიციალური ვიზიტით დღეს ეწვია.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ვენესუელაში მიწისძვრის შედეგად დაღუპულთა რიცხვი 235-მდე გაიზარდა, 50 000 დაკარგულად ითვლება

კობახიძე: კორუფცია ხელისუფლების ზედა ეშელონებში პრინციპულად აღმოფხვრილი, დამარცხებულია

ე.წ. სააფთიაქო ნარკომანიის საქმეზე ჯანდაცვის მინისტრის ყოფილი მოადგილე დააკავეს

NGO-ები: წლებია, წამებას და არასათანადო მოპყრობას სახელმწიფო პოლიტიკურ იარაღად იყენებს