ოკუპირებული აფხაზეთის „საგარეო უწყება“ - უვიზო მიმოსვლა მხოლოდ საქართველოს მოსახლეობაზე ვრცელდება

2017-02-03 19:22:17, 1707 ნახვა

პოლიტიკა

ოკუპირებული აფხაზეთის ე.წ საგარეო საქმეთა სამინისტროს განცხადებით, ევროპარლამენტის მიერ საქართველოსთვის უვიზო მიმოსვლის მინიჭების მხარდაჭერა, აფხაზეთის მოსახლეობაზე არ ვრცელდება, - ამის შესახებ აფხაზეთის ე.წ. საგარეო საქმეთა სამინისტროს განცხადებაშია აღნიშნული.

როგორც განცხადებაშია აღნიშნული, ოკუპირებული აფხაზეთის ე.წ. დეფაქტო აღნიშნულს აფასებს, როგორც თბილისის ხელისუფლების მორიგ მოუხერხებელ მცდელობას, რომ აფხაზეთის რესპუბლიკის მოსახლეობა საქართველოს პოლიტიკურ სივრცეში ჩართოს.

"მიხეილ ჯანელიძის განცხადებას ვაფასებთ, როგორც თბილისის ხელისუფლების მორიგ მოუხერხებელ მცდელობას, რომ აფხაზეთის რესპუბლიკის მოსახლეობა საქართველოს პოლიტიკურ სივრცეში ჩართოს. ნათელია, რომ ე.წ ნეიტრალური პასპორტების მეშვეობით ჩვენი ხალხის დაინტერესება, საქართველოს ხელისუფლებამ ვერ მოახერხა. სწორედ ამიტომ, ისინი ვიზალიბერალიზაციით ცდილობენ გეგმების შესრულებას. ასევე ნათელია, რომ ოფიციალური თბილისის მცდელობები, წინასწარ განწირულია.

აღნიშნულიდან გამომდინარე, აფხაზეთის საგარეო საქმეთა სამინისტრო აცხადებს, რომ საქართველოს ხელისუფლების მცდელობა, გამოიყენოს აფხაზეთის მოსახლეობა თავის პოლიტიკურ მანიპულაციებში უპერსპექტიოა. თუ საქართველოს ხელისუფლებას, შესტიკვა გული, იმაზე რომ, აფხაზეთის მოსახლეობა, საქართველოს გამო ვერ ახერხებს ევროკავშირის ქვეყნებში მოგზაურობას, მაშინ უნდა შეწყვიტოს ის საერთაშორისო იზოლაციური პოლიტიკა ჩვენს მიმართ.

კიდევ ერთხელ, მოვუწოდებთ ევროპულ სტრუქტურებს უარი თქვან საქართველოში პოპულისტური ქმედებების მხარდაჭერაზე. ამასთან, აფხაზეთის რესპუბლიკის მოქალაქეების დეიზოლაციას ვითხოვთ", - აღნიშნულია ოკუპირებული აფხაზეთის ე.წ საგარეო საქმეთა სამინისტროს განცხადებაში.

ცნობისთვის, ევროპარლამენტმა საქართველოსთვის უვიზო მიმოსვლის დაწესებას მხარი დაუჭირა.
ამასთან, საქართველოს საგარეო საქმეთა მინისტრის მიხეილ ჯანელიძის განცხადებით, უვიზოდ მიმოსვლას ოკუპირებული ტერიტორიების მოსახლეობაც შეძლებს.