დავით გელაშვილი: „ბავშვთა სამყაროს“ შენობაში შესვლა სახიფათოა

2017-02-01 13:15:32, 1062 ნახვა

საზოგადოება

შინაგან საქმეთა სამინისტროს საგანგებო სიტუაციების მართვის სააგენტოს უფროსის მოადგილის დავით გელაშვილის განცხადებით, სავაჭრო ცენტრ „ბავშვთა სამყაროს“ შენობის ფრაგმენტებად ჩამოშლის საფრთხე არსებობს და იქ შესვლა ძალიან სახიფათოა.

როგორც გელაშვილმა აღნიშნა, ამ დროისთვის შენობაში შესვლა აკრძალულია.

„შენობაში შესვლა სახიფათოა, ის უსაფრთხო არ არის. შესაძლებელია შენობა ნებისმიერ დროს ფრაგმენტებად ჩამოიშალოს. ჩვენი სამსახურის კატეგორიული გაფრთხილებაა, რომ ამ ეტაპისთვის, უსაფრთხოების თვალსაზრისით, შეუძლებელია, შენობაში ვინმე შევიდეს“, - განაცხადა გელაშვილმა.

სავაჭრო ცენტრ „ბავშვთა სამყაროში“ გაჩენილი ხანძრის შედეგად დაზარალებული მონაჭრეების ის ნაწილი, რომელთაც მატერიალური ღირებულების საქონელი დახლებზე ჰქონდათ განთავსებული, დილიდან შენობასთან არიან შეკრებილი.

ვერცხლისა და მინანქრის ნაკეთობებზე მოვაჭრეები შენობაში შესვლასა და საკუთარი ნივთების გამოტანას ითხოვენ.

ცნობისთვის, შენობაში გაჩენილი ხანძრის სრულად ლოკალიზებას დღეისთვის ვარაუდობენ. ადგილზე შვიდი სახანძრო-სამაშველო ბრიგადა და 70-მდე მეხანძრე-მაშველია მობილიზებული.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან