საქართველოს რესპუბლიკური პარტია მიიჩნევს, რომ არსებულ პოლიტიკურ ვითარებაში საქართველოს პრეზიდენტის არჩევის წესის შეცვლა და სახელისუფლებო უფლებამოსილებების შემცირება საფრთხეს შეუქმნის ქვეყანაში დემოკრატიის განვითარებას.

როგორც „რესპუბლიკური პარტიის“ მიერ გავრცელებულ განცხადებაშია აღნიშნული, საქართველოში შექმნილი ვითარება ნათლად აჩვენებს, რომ ხელისუფლება ყოველმხრივ ცდილობს განიმტკიცოს ერთპიროვნული ძალაუფლება და მყარი გარანტიები შეიქმნას საკონსტიტუციო ცვლილებების განხორციელების გზით.

„ჩვენ, რესპუბლიკელები, როგორც, ის პოლიტიკური ძალა, რომელიც არა მარტო კოალიცია „ქართული ოცნების“ წევრი იყო, არამედ უკანასკნელი 38 წლის განმავლობაში მუდმივად იმყოფებოდა პოლიტიკური მოვლენების ეპიცენტრში, თვალნათლივ ვხედავთ წინა ხელისუფლებების მიერ დაშვებული შეცდომების განმეორების საფრთხეს.

საფრთხე ემუქრება დემოკრატიული და სამართლებრივი სახელმწიფოებრიობის საყოველთაოდ აღიარებულ და საქართველოს კონსტიტუციაში დაფიქსირებულ იმ ფუნდამენტურ პრინციპს, რასაც ჰქვია ხელისუფლების დანაწილება, ურთიერთბალანსი და კონტროლი. მახინჯი საარჩევნო სისტემის მეშვეობით, „ქართულმა ოცნებამ“ არჩევნებში მიღებული ხმების ნახევარზე ნაკლებით, პარლამენტში მანდატების სამი მეოთხედი გაიფორმა. დღეს პარლამენტი არათუ არ აკონტროლებს აღმასრულებელ ხელისუფლებას, არამედ მისი ნების აღმსრულებლად გვევლინება. ასევე, წინა ხელისუფლების მორჩილ მოსამართლეთა (რომლებმაც თავი დაგვამახსოვრეს სამარცხვინო, უკანონო და ქვეყნისთვის დამაზარალებელი გადაწყვეტილებებით) გადაბირების გზით ხელისუფლებამ არაფორმალურად დაიქვემდაბარა სასამართლო სისტემა.

ყოველივე ზემოთქმულიდან გამომდინარე ვაცხადებთ, რომ არსებულ პირობებში საპარლამენტო რესპუბლიკის მოდელი არის მხოლოდ ბუტაფორია და შესაბამისად, საპარლამენტო რესპუბლიკის მოდელის დახვეწა-სრულყოფაზე ლაპარაკი კონსტიტუციის ცვლილებების მოსურნე ხელისუფალთაგან არის ტყუილი და საზოგადოებისთვის თვალის ახვევის მცდელობა.

ასეთ პირობებში განსაკუთრებული როლი ენიჭება საქართველოს პრეზიდენტს, როგორც პერსონალურად, ასევე ინსტიტუციურად, რადგან დღეს ის არის ერთადერთი კონსტიტუციური ორგანო, რომელიც ინარჩუნებს დამოუკიდებლობას ერთი ადამიანისა და მისი გუნდისაგან. ის არის მათი თვითნებური გადაწყვეტილებების ერთადერთი შემაფერხებელი სუბიექტი. ამ ვითარებაში, ჩვენთვის მიუღებელია როგორც პრეზიდენტის არაპირდაპირი არჩევის წესის შემოღება, ისე სახელისუფლებო ფუქნციებისგან, განსაკუთრებით საკადრო საკითხებიდან პრეზიდენტის ჩამოშორების მცდელობა. ამიტომ პრეზიდენტი არსებული სახელისუფლებო უფლებამოსილებებით კვლავ უნდა აირჩეს პირდაპირი წესით, მას უნდა დარჩეს უშიშროების საბჭო და უფლებამოსილებები ქვეყნის თავდაცვის სფეროში.

მიგვაჩნია, რომ შექმნილ ვითარებაში სწორედ პრეზიდენტის უფლებამოსილების და არჩევის წესის შენარჩუნებით ჩვენ, საპარლამენტო რესპუბლიკის მნიშვნელოვან კომპონენტებსაც შევინარჩუნებთ და კონსტიტუციურადაც არ გადავჩეხავთ ქვეყანას პერსონალური უპასუხისმგებლო მმართველობის მორევში“,-ნათქვამია განცხადებაში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კახა კალაძე 4 ოქტომბრის საქმეზე მორიგ დაკავებაზე: შესაბამისი საგამოძიებო უწყებები მოწოდების სიმაღლეზე არიან, ყველამ უნდა აგოს პასუხი

კახა კალაძე ელისაშვილის განაჩენზე: როდესაც კანონს ცდები, ყოველთვის მოყვება შესაბამისი რეაგირება

პოლიციამ ფატიმა კარიმოვას მკვლელობისთვის ძებნილი ბიძაშვილი, ემინ ალიევი ბათუმის საერთაშორისო აეროპორტში დააკავა

Apple-მა OpenAI-ს უჩივლა და კომპანიას სავაჭრო საიდუმლოებების მოპარვაში დასდო ბრალი