სამეგრელო-ზემო სვანეთის შესწავლის შედეგად, რეგიონის განვითარებისთვის გამოიკვეთა სამი ძირითადი მიმართულება: სოფლის მეურნეობა, სატრანსპორტო-ლოგისტიკური განვითარება შესაბამისი მომსახურებით და ტურიზმი, - ამის შესახებ პრემიერ–მინისტრმა სამეგრელო–ზემო სვანეთის ეკონომიკური პოტენციალის პრეზენტაციაზე განაცხადა.

ირაკლი ღარიბაშვილის განმარტებით, რეგიონში არსებობს დიდი რესურსი, როგორც სოფლის მეურნეობის განვითარებისთვის, ისე ხის სამშენებლო მასალებისა და ავეჯის გადამამუშავებელი საწარმოების ამოქმედების და სამშენებლო მასალების წარმოებისთვის.

„ასეთი სიმდიდრის მქონე რეგიონი ეკონომიკურად უნდა გაძლიერდეს. ჩვენ ეს რესურსი მაქსიმალურად უნდა ავითვისოთ. ამასთან, სამეგრელო-ზემო სვანეთი არის ისტორიულ-კულტურული მემკვიდრეობით მდიდარი და გეოგრაფიული ლანდშაფტით გამორჩეული რეგიონი. ჩვენ ამ მიმართულებითაც აქტიურად უნდა ვიმუშაოთ და ის დიდი პოტენციალი, რომელიც სამეგრელოს ტურიზმისთვის აქვს, დაუშვებელია, რომ მთლიანად არ გამოვიყენოთ,“–აღნიშნა პრემიერმა.

მთავრობის მეთაურმა იმედი გამოთქვა, რომ სამეგრელო-ზემო სვანეთში საინტერესო ბიზნესპროექტები განხორციელდება.

„დღეისთვის ამ რეგიონში მიმდინარე საინვესტიციო პროექტების ჯამური ღირებულება 224 მილიონ ლარს აჭარბებს. მხოლოდ ფოთში 25 მილიონ დოლარზე მეტი ღირებულების პროექტები ხორციელდება; 6 მილიონი ლარის ინვესტიციაა ჩადებული ხობში; წალენჯიხაში ინვესტიციის ოდენობა 2 მილიონ დოლარზე მეტია, მესტიაში კი შემოსულია 1 მილიონი დოლარის ინვესტიცია,“–განაცხადა ირაკლი ღარიბაშვილმა.

მისივე განმარტებით, მხოლოდ გასულ წელს სამეგრელო-ზემო სვანეთის რეგიონში შემოვიდა 59 მილიონ დოლარზე მეტი პირდაპირი უცხოური ინვესტიცია, რომელიც ჩაიდო ტრანსპორტისა და კავშირგაბმულობის, სოფლის მეურნეობისა და თევზჭერის, გადამმუშავებელი მრეწველობის, მშენებლობის, სასტუმროებისა და რესტორნების, სამთო-მოპოვებითი მრეწველობის მიმართულებით.

ვრცელ გამოსვლაში პრემიერმა ხელისუფლების მიერ რეგიონში განხორციელებულ პროექტებსა და სამომავლო გეგმებზე ისაუბრა.

„2016 წლის ბოლომდე დასრულდება მრავალპროფილიანი საუნივერსიტეტო კლინიკის მშენებლობა სოფელ რუხში. ეს არის ძალიან მნიშვნელოვანი პროექტი, რომელიც, დარწმუნებული ვარ, სრულიად სხვა რეალობას შექმნის ადგილობრივი მოსახლეობისთვის. სამეგრელო-ზემო სვანეთის მოსახლეობას ექნება მაღალი სტანდარტის თანამედროვე კლინიკა, სადაც მაღალი დონის სამედიცინო მომსახურებას გაუწევენ. გარდა ამისა, ჩვენს აფხაზ ძმებს ექნებათ საშუალება, ნებისმიერ დროს ისარგებლონ მაღალი ხარისხის სამედიცინო მომსახურებით,“–აღნიშნა ირაკლი ღარიბაშვილმა.

პრემიერ–მინისტრმა ბიზნესმენებს რეგიონების განვითარების პროცესში ჩართულობისკენ მოუწოდა და განაცხადა, რომ ბიზნესს ხელისუფლების მხრიდან სრული მხარდაჭერა ექნება.

სამეგრელო–ზემო სვანეთის ეკონომიკური პოტენციალის პრეზენტაცია ანაკლიაში გაიმართა და მას ბიზნესის წარმომადგენლები, საქართველოს მთავრობის წევრები და ადგილობრივი ხელისუფლების წარმომადგენლები დაესწრნენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს