ზურაბ პატარაძემ სოხუმის დაცემის დღესთან დაკავშირებით ჟიული შარტავას მემორიალი გვირგვინით შეამკო და დაღუპული მებრძოლების ხსოვნას პატივი მიაგო

2016-09-27 16:41:04, 708 ნახვა

საზოგადოება

აჭარის მთავრობის თავმჯდომარემ ზურაბ პატარაძემ სოხუმის დაცემის დღესთან დაკავშირებით, საქართველოს ტერიტორიული მთლიანობისთვის დაღუპული ეროვნული გმირის, ჟიული შარტავას მემორიალი გვირგვინით შეამკო და დაღუპული მებრძოლების ხსოვნას პატივი მიაგო.

,,27 სექტემბერი ჩვენს უახლეს ისტორიაში ერთ-ერთი ტრაგიკული თარიღია. ეს არის დღე, რომელიც არასოდეს უნდა მიეცეს დავიწყებას. დაიღუპა უამრავი ადამიანი. ჩვენ პატივი უნდა მივაგოთ მათ და მათი სახელები არ უნდა მიეცეს დავიწყებას. აფხაზებთან მშვიდობას და მეგობრობას ალტერნატივა არ გააჩნია. მხოლოდ მშვიდობიანად, ნაბიჯ-ნაბიჯ უნდა ვიაროთ შერიგებისკენ, საქართველოს გაერთიანებისკენ"- აღნიშნა მთავრობის თავმჯდომარემ.

დაღუპული გმირების ხსოვნას, აჭარის მთავრობის თავმჯდომარესთან ერთად, პატივი მიაგეს აჭარის უმაღლესი საბჭოს თავმჯდომარემ, ქალაქ ბათუმის მერმა და მთავრობის სხვა წევრებმა. ღონისძიებას დაღუპულთა ოჯახის წევრებიც ესწრებოდნენ.

ბათუმის მერიის ინიციატივით, ამ დღესთან დაკავშირებით აფხაზეთის ომში დაზარალებულთა და ომში დაღუპულთა 70-ზე მეტ ოჯახს ერთჯერადი მატერიალური დახმარების სახით 300 ლარის ოდენობის თანხა გადაეცათ.

23 წლის წინ, 1993 წლის 27 სექტემბერს სოხუმი დაეცა. სამხედრო დაპირისპირება აფხაზეთში 1992 წლის 14 აგვისტოს დაიწყო. კონფლიქტი ქართულ სამთავრობო ჯარებსა და აფხაზ სეპარატისტთა ძალებს შორის 13 თვესა და 13 დღეს გრძელდებოდა. სოხუმისთვის გადამწყვეტ ბრძოლას 27 ივლისს სოჭში ცეცხლის შეწყვეტისა და და სამხედრო ტექნიკის კონფლიქტის ზონიდან გაყვანის შესახებ დადებული შეთანხმება უძღოდა, თუმცა აფხაზური მხრიდან ის 16 სექტემბერს დაირღვა.

ქართული მხარის ამ დრომდე დაუზუსტებელი მონაცემებით, 10 ათასზე მეტი ქართველი ჯარისკაცი და მშვიდობიანი მოქალაქე დაიღუპა. 300 ათასი აფხაზეთიდან დევნილი კი უსახლკაროდ დარჩა.

სოხუმის დაცემის დღეს, რუსმა ოკუპანტებმა და აფხაზმა სეპარატისტებმა აფხაზეთის უზენაესი საბჭოს თავმჯდომარე ჟიული შარტავა 30-მდე ქართველთან ერთად დახვრიტეს.

(NS)